Өнгөрсөн ням гарагт буюу өчигдөр таван ханатай гэр шатаж, 3-7 насны дөрвөн хүүхэд галд өртөж, амиа алдсан харамсалтай хэргийн талаар бид өмнө нь мэдээлсэн билээ. Хэргийн талаар тус хорооны Засаг даргаас тодруулахад “Гал манай хорооны I хэсгийн 62 дугаар гудамжны .. тоотод гарсан. Тус хашаанд хоёр айл амьдардаг бөгөөд тухайн өдөр хүүхдүүдээ нэг гэртээ цоожлоод, ажилдаа явсан юм билээ. Сайжруулсан түлш түлж байгаатай холбогдуулан манай хороонд иргэдийн аюулгүй байдлын төлөө эргүүл ажиллаж байгаа. Алба хаагчдыг эргүүлээр явж байхад тэр айлын тооноор утаа гараад байхаар яваад очсон гэсэн. Очиход нь Онцгой байдлын газрын гал сөнөөгчид ирчихсэн, гэр нь бараг шатаад дуусаж байсан гэсэн. Өчигдөр хэргийн газар бид 23:00 цаг хүртэл байсан. Гэхдээ цагдаагийн алба хаагчид хамгаалалт авсан учраас хэргийн газар руу ойртуулаагүй. Гал юунаас болж гарсан болон гэр нь цоожтой байсан эсэхийг сайн мэдэхгүй. Одоогийн байдлаар хүүхдүүдийн аав, ээжийн нөхцөл байдал маш хүнд байна” гэлээ.