Сэлэнгэ аймгийн Цагааннуур сумын нутагт ой дөрвөн сартай хүүхэд эцгийнхээ гарт амиа алдсан хэрэг гарчээ. Тодруулбал, өнгөрсөн амралтын өдөр 33 настай З нь архи ууж, согтуурсан үедээ дагавар хүүгээ модоор зодож, амийг нь хөнөөсөн аж. Хэргийн талаар цагдаагийн байгууллагад хүүгийн ар гэрийнхэн дуудлага өгсөн байна. Дуудлагын дагуу хэргийн газарт очиход хүүгийн чих, амнаас их хэмжээний цус гарсан байдалтай, амиа алдсан байжээ. Хүү эмнэлгийн анхан шатны тусламж авч чадалгүй нас барсан гэнэ.  

Хэргийн талаар Цагааннуур сумын Засаг дарга Н.Зоригоогоос тодруулахад “Манай сумын хамтарсан баг шуурхай хуралдаж байна. Тэгэхээр нарийн мэдээлэл өгөх боломжгүй. Амиа алдсан ой дөрвөн сартай Б хүүгийн ар гэрийнхэн Цагаан нуур суманд бүртгэлгүй” гэлээ.

Тус хэргийг үйлдсэн гэх сэжигтэн З-г цагдаагийн байгууллагаас цагдан хориод байгаа юм байна.

Бид энэ хэргийн талаар эргэн мэдээллэх болно.