Дорнод аймгийн Хөлөнбуйр сумын гуравдугаар багийн нутаг дэвсгэрт хоёр хүн амиа алдаж, хоёр хүүхэд хүнд бэртжээ. Тодруулбал, энэ сарын 15-16-нд шилжих шөнө “Приус-20” маркийн автомашины жолооч 24 настай, эрэгтэй Б нь архи согтууруулах ундааны зүйл хэрэглэсэн үедээ тээврийн хэрэгсэл жолоодон хөдөлгөөнд оролцсоны улмаас айл дайрч, гэрт байсан 15 настай, эрэгтэй Д, зургаан настай, эрэгтэй А-г хүнд гэмтээж, 43 настай Г, О нарыг хөнөөсөн байна.

Энэ талаар Хөлөнбуйр сумын Засаг дарга У.Ганхуягаас тодруулахад “Хэрэг өчигдөр шөнө гарсан байна. Манай сумын гэр бүлийн хүмүүс амиа алдаж, хоёр хүүхэд нь бэртсэн. Тэднийг гэртээ унтаж байх үед согтуу жолооч машинаараа гэрийг нь дайрсан шиг байгаа юм. Талийгаачийнх замын хажууд, хашаагүй гэрт амьдардаг байсан юм. Хүүхдүүдийн биеийн байдал тун тааруу, аймгийн төвийн эмнэлэг рүү аваад явлаа. Талийгаач нар эрхэлсэн тодорхой ажилгүй, нөхөр нь хөгжлийн бэрхшээлтэй. Осол гаргасан жолооч нь манай нутгийн хүн биш.  Манай сумын Хэрлэн голд залуучууд морио сойхоор намрын цагт газар газраас ирдэг. Тэр шугамаар л ирж, морио хүйтэн усанд сойж байсан залуучууд гэнэ лээ. Сонгуулийн өдрүүдэд аймгийн Засаг даргын захирамжийн дагуу архи, согтууруулах ундаа зарахыг хориглосон. Тэд энэ үед хаанаас архи, согтууруулах ундаа авсныг тодруулахаар ажиллаж байна” гэлээ.

Тээврийн цагдаагийн албаны Жижүүрийн шуурхай удирдлагын хэлтэст өчигдөр нийт 1171 дуудлага иржээ. Үүнээс зам тээврийн ослын шинжтэй 914 дуудлага, мэдээлэл бүртгэгдсэн байна. Бүртгэгдсэн зам тээврийн ослын улмаас 29 хүн гэмтэж, зургаан хүн амиа алджээ.