Талийгаачийн ар гэр: Санамсаргүй байдлаар л нэгнийхээ аминд хүрчихлээ

Өмнөговь аймгийн Цогтцэций сумын ИТХ-ын төлөөлөгч байсан хүмүүс нэгнийхээ аминд хүрсэн талаар бид өмнө нь мэдээлсэн билээ. Хэргийн талаар талийгаач С.М –ийн ар гэрээс тодрууллаа.

-Юуны өмнө та болон таны гэр бүлд эмгэнэл илэрхийлье. Хэргийн талаар тодорхой мэдээлэл өгч болох уу?

-Талийгаач маань гэнэтийн ослоор бурхны оронд заларч бидэнд нөхөж баршгүй гарз тохиолдлоо. Улс төр, сонгуультай холбож буруу ташаа мэдээлэл их гарч байна. Талийгаач найзуудтайгаа хамт өчигдөр жаахан архи уусан юм билээ. Тэгээд найз нь хашаанаас гарахдаа санамсар болгоомжгүйгээсээ болоод мөргөж, амийг нь хөнөөсөн. Талийгаач сумын ИТХ-д нэр дэвшиж байсан юм. Харин найз нь тусалж, сонгуулийнх нь сурталчилгаанд ажиллаж байсан.

-Хэрэг яг хаана гарсан юм бэ?

-Гэрээс нь холгүй сумын төвийн айлын хашаанд болсон. Талийгаач сум орон нутгийнхаа төлөө  цуцашгүй тэмцэж явсан хүн. Энэ сумын уугуул иргэн. Өнгөрсөн 2016 оны сонгуулиар ИТХ-д нэр дэвшиж, төлөөлөгчөөр сонгогдоод байсан юм.

-Хэрэг гарахын өмнө талийгаач гэр бүлийнхээ хүнтэй ярьсан болов уу?

-Найзуудтайгаа уулзаж байгаа талаараа эхнэртээ хэлсэн юм билээ. Хэрэг гарахын өмнөхөн “Одоо тарж байна, ирээд ав” гэж хэлээд утсаа салгасан байна лээ. Утсаар яриад удалгүй авахаар очиход л ийм аймшигтай хэрэг гарчихсан байсан гэсэн.

-Талийгаач хэдэн хүүхэдтэй вэ?

-Эхнэр, хоёр хүүхдийн хамт амьдардаг байсан.

-Цахим орчинд улс төрийн зорилгоор нэгнийхээ амийг хөнөөсөн гэсэх мэдээлэл багагүй гарсан. Талийгаач, сэжигтэн хоёр хоорондоо муудалцаж, хэрүүл маргаан гарсан зүйл байгаа болов уу?

-Тэд чинь найзууд. Ямар ч маргаан гараагүй гэсэн. Санамсаргүй байдлаар л нэгнийхээ аминд хүрчихлээ. Тэрнээс ямар нэг улс төрийн зорилго, санаатайгаар нэгнийнхээ аминд хүрсэн асуудал байхгүй тул залруулга хийж байна.