ЗХЖШ-ын нэгдүгээр орлогчийн ажлын албыг хашиж байсан бригадын генерал нь эхнэртээ хутга тулгаж, гэр бүлийн хүчирхийлэл үйлдсэн талаар бид мэдээлсэн билээ. Тодруулбал, хахуулийн хэрэгт нэр холбогдож, АТГ-аас шалгаж байсан бригадын генерал Ц.Жавхланбаатар өнгөрсөн сарын 15-ны шөнө эхнэртээ хутга тулгаж, амь насанд нь заналхийлсэн тухай дуудлага цагдаагийн байгууллагад иржээ.

     Дуудлагын дагуу Баянзүрх дүүргийн Цагдаагийн нэгдүгээр хэлтсийн албан хаагчид шалгалтын ажиллагаа явуулахад бригадын генерал Ц.Жавхланбаатар согтуу, эхнэр, хүүхдэдээ агсам тавьж байсан үйлдлийг таслан зогсоосон байдаг. Цагдаагийн албан хаагчид Ц.Жавхланбаатарт хэрэг бүртгэлийн хэрэг нээн шалгаж байсан юм. Баянзүрх дүүргийн Цагдаагийн газрын нэгдүгээр хэлтсийнхэн түүнийг Эрүүлжүүлэх байрандаа саатуулж, Зөрчлийн тухай хуулийн 6.20-7 дахь хэсгийн “Хүүхдийн бие махбодод халдсан, эсхүл үл хайхарсан, эсхүл хүүхдийн дэргэд архидан согтуурсан, мансуурсан, хүчирхийлэл үйлдсэн нь эрүүгийн хариуцлага хүлээлгэхээргүй бол хүнийг гурван зуун нэгжтэй тэнцэх хэмжээний төгрөгөөр торгоно” гэх үндэслэлээр зөрчлийн хэрэг нээн торгох шийтгэл ногдуулсан байна. Харин ҮБХИС-иас бригадын генерал Ц.Жавхланбаатарын цалинг гурван сарын хугацаанд 20 хувь бууруулах хариуцлага хүлээлгэсэн гэнэ.