Сонгуулийн ерөнхий хорооны ээлжит хуралдаан цахимаар болж, Монгол Улсын Ерөнхийлөгчийн ээлжит сонгуулийн бэлтгэл ажлын хүрээнд зургаан асуудал хэлэлцэн шийдвэрлэлээ. Санал авах байрны ерөнхий шаардлагыг боловсруулахдаа Стандарт, хэмжил зүйн газраас тогтоосон MNS 6055:2009 “Иргэний барилгын төлөвлөлтөд хөгжлийн бэрхшээлтэй хүний шаардлагыг тооцсон орон зай, орчин бүрдүүлэх юм. Үндсэн шаардлага”, MNS 6056:2009 “Явган хүн, хөгжлийн бэрхшээлтэй иргэдэд зориулсан замыг төлөвлөх заавар”-ын стандартуудыг үндэслэл болгосон юм.

Уг шаардлагад санал авах байрны гадна болон дотор орчинд тавих шаардлагыг тодорхой зааж өгснөөс гадна байрны ашиглалтын талбайн доод хэмжээг тусган баталсан. Тухайлбал, аймгийн төв болон дүүрэгт байрлалтай санал авах байрны талбай нь 80 м.кв-аас багагүй, сумын төвд 60 м.кв-аас багагүй, багт байгуулах санал авах байр нь 20 м.кв-аас багагүй байхаар тогтоож өгөв. Ийнхүү талбайн хэмжээ зааж өгснөөр санал авах байранд үүсэх иргэдийн бөөгнөрөл, ачааллыг бууруулах,  сонгогчийн саналын нууцлалыг хангах, санал авах ажиллагааны явцад ажиглалт хяналт хийх боломжийг нэмэгдүүлэх юм.

Эх сурвалж: Монгол Улсын Сонгуулийн ерөнхий хороо