Ард иргэд сар шинийн баярт зориулж чимхсэн, бэлдсэн бууз, баншаа ихэвчлэн гадаа хөлдөөдөг билээ. Гэтэл гадаа хорт утааны хэмжээ аюулын түвшинд хүрээд байгааг албаныхан, мэргэжилтнүүд анхааруулсаар байна. Өөрөөр хэлбэл, хорт утаатай орчинд хөлдөөсөн бууз, банш бидний биед ямар хор нөлөө үзүүлдэг вэ.

           Улсын нийслэл Улаанбаатар хотдоо сайжруулсан түлш буюу шахмал түлш хэрэглэсэн учраас агаарын бохирдол, утаа өнгөрөгч  хоёр жилд харьцангуй бага байлаа. Нэг үгээр хэлбэл, иргэдийн ам, нүдийг хэсэг хугацаанд амраасан гэхэд буруудахгүй. Харамсалтай нь, энэ жил эргээд л хоолой хорсгосон хорт утаа зөвшөөрөгдөх хэмжээнээс /50 AQI- зөвшөөрөгдсөн хэмжээ, 481AQI- Баянхошуу орчмын хэмжээ/ даруй хэд дахин ихэслээ. Нунтагласан нүүрсийг барьцалдуулагч бодистой хольсныг шахмал түлш гэж нэрлэдэг. Үүнийг шатаахад илч нь нэмэгддэг боловч нүүрс төрөгчийн дан исэл ихээр ялгардаг. Агаарт байгаа нэг сая молекул тутамд  70 ширхэг нүүрстөрөгчийн дан исэл байхад хүний эрүүл мэндэд сөрөг нөлөө үзүүлж эхэлдэг. Энэ нь хүний нүдэнд харагдаж, үнэртдэггүй учраас маш богино хугацаанд хордох нөхцөл бий болдог. Хүний цусанд химиглобин гэх  хүчилтөрөгчийг зөөх үүрэгтэй уураг байдаг бөгөөд энэ нь нүүрстөрөгчийн дан ислийг 100 дахин илүү хурдтайгаар дамжуулдаг байна. Хүн хордож байгаагаа өөрөө мэдэх боломжгүй. Илрэх шинж тэмдэг нь толгой өвдөж, дотор муухайрч бөөлждөг. Улмаар хүчилтөрөгчийн дутагдалд орж ухаан алдан тархи нь үхжиж эхэлдгийг эмч, судлаачид анхааруулж байна. Иймд хорт утаа аюулын хэмжээнд хүрсэн энэ үед бууз, банш тэргүүтэй хоол, хүнсээ гадаа тавих, хөлдөөх нь бидний болоод үр хүүхдүүдийн маань эрүүл мэндэд асар их хор хөнөөл учруулна гэдгийг эрүүл мэндийн зөвлөхүүд анхааруулж, сэрэмжлүүлж байна.