УИХ-ын чуулганы аравдугаар сарын 24-ны хуралдаанаар УИХ-ын гишүүд Б.Энхбаяр гишүүнийг Хууль зүй, дотоод хэргийн сайдаар томилохыг дэмжсэн. Энэ үеэр УИХ-ын гишүүн Ж.Батсуурь "Хямралаас гарах боломж танай бүлэгт бүрэн байгаа. Гэхдээ сүүлийн үед нэг л их үндсэн хууль ярьсан, хуулиа өөрсдөө зөрчсөн байдалтай улс байна. Тиймээс би Б.Энхбаяр гишүүнийг ярьж буй зүйлээ богино хугацаанд хийж, төрийн хямралаас гарах анхны учгийг татаж, цэг тавьж өгөх байх гэж найдаж байна. Хорвоо дээр хоёр үнэн гэж байхгүй. Хэрэв та хүн гүтгэсэн бол хариуцлага хүлээх ёстой. Буруу зүйлд цэг тавьж өгөх боломж нь бүрдэж байгаа гэж бодон таныг дэмжиж байна.Б.Энхбаяр гишүүн ээ танд итгэж байна. Та харин итгэл эвдсэн дараагийн бүлэглэлийн толгойлогч болчихов. Танд анхаарууллаа шүү" гэв.