Ерөнхий сайдын Саудын Арабт хийсэн айлчлалын хүрээнд эрчим хүчний чиглэлд хамтран ажиллахаар ярилцсан асуудлын талаар Эрчим хүчний реформын Үндэсний хорооноос мэдээллээ. Энэ талаар Шадар сайд, Эрчим хүчний үндэсний хорооны дарга Т.Доржханд дараах мэдээллийг хийлээ. 

Тэрбээр "Эрчим хүчний реформ байхгүй бол эдийн засаг уналтад орно. Эрчим хүчний шилжилт хийгдээгүй 34 жил явсны үр дүнд эдийн засаг хөгжөөгүй өдийг хүрсэн. Нэн тэргүүнд дотоодын эрчим хүчээ 100 хувь хангах ажлыг эхлүүлэх нь зүйтэй гэж зорьж байгаа. Сайн мэдээ дуулгахад Монгол Улс эрчим хүч экспортлох гарц нээгдэж байгаа. Арабын Нэгдсэн Эмират улс ногоон эрчим хүчний салбарт манайхтай хамтарч ажиллахаа илэрхийлсэн. Тэгэхээр гадаадын хөрөнгө оруулалт татсан том реформыг хийхээр зорьж байна. Худалдан авагч нь БНХАУ байна. Шанхайн экспогийн үеэр Хятадын ЗГ Ерөнхий сайдын түвшинд уулзаж, хил холболтуудаа хийж, эрчим хүчний салбарт хамтарч ажиллах боломжтойгоо илэрхийлсэн. Өнгөрсөн 10 сард төсөв хэлэлцэж байх үед ийм саналаа өгсөн нь үнэн. Үүний дараа нэлээд ажил хийсэн, тариф өөрчлөгдсөн, бодлого өөрчлөгдсөн. Зарим УИХ-ын гишүүдэд энэ мэдээлэл очоогүй тул мэдээллийн зөрүүтэй байдал үүссэн байна. Сангийн яамнаас хэвлэл мэдээллийн зардал гэсэн ангилал руу оруулчихсан юм билээ. Эрчим хүчний үндэсний хороонд ажиллаж байгаа УИХ-ын гишүүд маш их сэтгэл гарган ажиллаж байгаа, тэдний нэг нь С.Цэнгүүн. Маш их дайралтад өртөж байна, бүгд л өртөж байгаа. Бид ард нь гарна" гэлээ.