Сэтгүүлч Н.Өнөрцэцэгт холбогдох шүүх хурал өнөөдөр 10:00 цагт Нийслэлийн давж заалдах шатны шүүхэд эхэлсэн. Түүний шүүх хурлыг нээлттэй явуулах, цаашлаад шүүх хуралдаанд ажиглагчаар оролцох тухай хүсэлт, санал, шаардлагууд нэр бүхий Улсын Их хурлын гишүүд, Хүний эрхийн үндэсний комисс, Сэтгүүлчдийн нэгдсэн эвлэл гэх зэрэг байгууллага, нэр бүхий иргэд хүргүүлээд байгаа билээ.  Тэгвэл Н.Өнөрцэцэгт холбогдох шүүх хурлын талаар хэн юу гэснийг хүргэе.

Өмгөөлөгч П.Эрхэмбаяр "Хэргийн оролцогч биш талууд шүүх хуралдааныг нээлттэй явуулах эсвэл ажиглагчаар суух хүсэлт гаргасан байна. Н.Өнөрцэцэг энэ хүсэлтээ мөн гаргасан. Өмгөөлөгчийн зүгээс бол шүүх бүрэлдэхүүнд дахин тусгаарлаж нээлттэй явуулах хүсэлт гаргана. Үүнийг шүүх бүрэлдэхүүн гаргана. Өмнөх хүсэлтийг хариуцаж авсан шүүх дангаараа шийдвэр гаргасан бол одоо гурван бүрэлдэхүүнтэй шүүх шийдвэр гаргах. Шүүх хуралдаан нээлттэй явуулах хуулийн заалттай. Энэ ганц төрийн нууцтай холбоотой асуудал биш. Хэсэгчлэн нээлттэй хийх боломж байгаа гэдэг хүсэлтээ өгсөн байгаа. Энэ салбарт ажиллаж байгаа өмгөөлөгчийн хувьд би давж заалдах шатны шүүхэд итгэнэ" гэлээ

УИХ-ын гишүүн Ж.Баярмаа "Шүүх хуралд ажиглагчаар орох хүсэлтээ өгөхдөө би хоёр хүсэлт тавьсан. Нэгдүгээрт шүүх хурлын нээлттэй явуулж өгөөч гэсэн хүсэлт тавьсан, хоёрдугаарт шүүх хуралд ажиглагчаар суух хүсэлтээ тавьсан. Аль алийг нь хүлээж аваагүй. Хуульд шүүх хурлыг хаалтай хийх, зарим хэсгийг нь нээлттэй хийх үндэслэл бий. Гэхдээ хуулийн цоорхойг ашиглан бүхэлд нь хаалттай хийж байна. Сэтгүүлч Н.Өнөрцэцэгт 20 гаруй заалттай зүйл анги үүсгэсэн. Хамгийн гол нь цаашдаа ийм хэрэг давтагдах эрсдэлтэй. Өмнө ч ийм хэрэг болж байсан. Монгол Улс 40 мянган хүнийг хэлмэгдүүлж байсан түүхтэй. Цаашдаа нэг ч хүнийг хэлмэгдүүлж болохгүй. Монгол хүний үг, үзэл бодлоо илэрхийлэх эрхийг Үндсэн Хуульд зааж өгсөн байдаг. Гэтэл иргэн байтугай сэтгүүлчийнхээ үг хэлэх, ажил үүргээ гүйцэтгэх эрх чөлөөг хаасан ноцтой хэрэг болж байна” гэв.

Өмгөөлөгч Ц.Хишигжаргал “Н.Өнөрцэцэгийн зүгээс шүүх хуралдааныг нээлттэй явуулахыг хүсэж, арваннэгдүгээр сарын 4-ний өглөөний 9:00 цагаас эхэлж өлсгөлөн зарласан. Түүнээс хойш 52 цагийн турш юу ч идээгүй байна. Н.Өнөрцэцэг өлсгөлөн зарлахтайгаа зэрэгцэн хорих 461-р ангид хүсэлтээ өгсөн. Хүсэлтийн дагуу эмч нарын шинжилгээнд хамрагдсан юм. Шинжилгээгээр түүнийг бөөрний архаг дутагдалтай байгаа учир өлсгөлөн зарлавал биед нь маш эрсдэлтэй гэж дүгнээд, хүсэлтийг нь хүлээж аваагүй. Гэсэн ч Н.Өнөрцэцэг сайн дураараа юм идэхгүйгээр 52 гаруй цаг болсон байна. Н.Өнөрцэцэгтэй уулзаад гарч ирлээ. Түүний бөөр нь өвдсөн, хаван ихтэй, нойргүйдэлд орчихсон байна. Чийгтэй, хүйтэн, нарны шууд тусгалгүй өрөөнд юм идэхгүй байна гэдэг маш хүнд. Мөн уулзахад нэлээд тамирдсан нь харагдлаа. Дуу нь цаашаа орчихсон, хэцүүхэн ярьж байна. Гэсэн ч миний үйлчлүүлэгч өлсгөлөнгөө зогсоохгүй, үргэлжлүүлсээр байна гэдгээ илэрхийлсэн" гэлээ.