Нүүрсний хулгайн асуудал олон нийтийн анхаарлыг татаж, нүүрсний хулгайчдыг зарлахыг шаардсан залуучуудын жагсаал долоо дахь өдрөө үргэлжилж байна. Тэгвэл нүүрсний хулгайтай холбоотой УИХ-ын гишүүн Х.Ганхуяг дараах байр суурийг илэрхийллээ.

Тэрбээр "Нүүрсний хулгайн голлох дүн Ерөнхийлөгч асан Халтмаагийн Баттулгатай хамааралтай гэдгийг би ч бас шууд л хэлье. Бидний хайгаад байгаа 44 их наядын нүүрс хэд хэдэн хүчин зүйлээс хамааралтай. Үүнд: алдагдсан нүүрс ч байгаа, үнийн зөрүү, тээврийн хохирол, нууц гэрээ Офтейк гэх олон зүйлээс бүрдэнэ. Хамгийн гол нь манай улс өнгөрсөн олон жилүүдэд нүүрсээ төмөр замаар биш машинаар зөөж байсан. Цар тахлын жилүүдэд тээврийн үнэ бүр тэнгэрт хадсан. Нэг тонн нүүрсийг 30 км газарт 400 доллароор зөөж байсан гэдгийг сая хэлэлцүүлэг дээр гишүүд хэлж байна. Энэ үнэн. Үүнээс гадна “Намайг нүүрсний хулгайд хамааралтай юу гэж БГД-ээс сонгосон сонгогч” асууж байсан. Би хамааралгүй гэдгээ хариуцлагатайгаар хэлье" гэлээ.