Хууль зүй, дотоод хэргийн сайд Х.Нямбаатар “Эрүүгийн хэрэг хянан шийдвэрлэх тухай хуульд нэмэлт, өөрчлөлт оруулах тухай хуулийн төсөл”-тэй хамт өргөн мэдүүлсэн Прокурорын тухай хуульд өөрчлөлт оруулах тухай хуулийн төслөө татна гэдгээ УИХ-ын Хууль зүйн байнгын хорооны өнөөдрийн хуралдаанаар мэдэгдлээ. Тэрбээр “Нийгмийн зүгээс олон шүүмж, шаардлагууд тавилаа. Ерөнхийлөгчийн бүрэн эрхэд 2017 оны энэ хуулиар халдсан юм. Үндсэн хуульд Ерөнхий прокурорыг заавал прокурорын байгууллага дотроос томилно гэсэн үг өгүүлбэр байхгүй. Үндсэн хуультай нийцүүлэх алхам хийсэн үйлдлийг улс төрийн намууд ялангуяа сөрөг хүчний зүгээс шүүмжлэлтэй хандаж байна. Тийм учраас өргөн барьсан хуулийн төслөөсөө Прокурорын тухай хуульд өөрчлөлт оруулах тухай хуулийн төслийг татаж авахаар болсоноо албан ёсоор мэдэгдэж байна. Дагасан хуулийг татаж авч байгаа бичгээ Засгийн газрын хуралдаанаар оруулна" гэлээ.