Нийслэлийн ИТХ-ын сонгуульд ХҮН намыг оролцуулах сонгуулийн хорооны шийдвэрийг Захиргааны хэргийн шүүхээс түдгэлзүүлсэн юм. Гэтэл өнөөдөр Захиргааны хэргийн шүүхийн шүүгч захирамжаа хүчингүй болгожээ. Тиймээс нийслэлийн ИТХ-ын сонгуульд ХҮН намаас 27 нэр дэвшигч оролцохоор болсныг ХҮН-ын нийслэлийн намын хорооны дарга П.Наранбаяр мэдээлэв.

Өмнө нь, Захиргааны хэргийн шүүхэд нэхэмжлэл гаргасан О.Бямбадэлгэр нарын ашигласан тамга нь хуурамч гэдгийг Тагнуулын ерөнхий газраас мэдэгдсэн. Улмаар хуурамч тамгатай нэхэмжлэлийн дагуу гаргасан шүүхийн шийдвэр хүчингүй тул цуцлахыг ХҮН-ынхан шаардсан юм. Өнөөдөр ХҮН-ынхан шүүхийн шийдвэрийг цуцлахгүй бол тэмцлийн хурц хэлбэрт шилжинэ гэдгээ мэдэгдлээ.