“Зөрчлийн тухай хуулийн шинэчилсэн найруулгын төсөл”-ийн талаарх  хэлэлцүүлэг өнөөдөр боллоо.

Энэ үеэр Хууль зүй, дотоод хэргийн сайд Х.Нямбаатар “2300 зөрчлийг шинээр томьёолж, зарим зөрчлийг нэгтгэж, давхардлыг нь арилгана. Зөрчлийн тухай хуульд “зөрчил” гэж томёлсоныг эрх зүйн онол талаас нь шинээр найруулж бичнэ. Гэхдээ энэ нь бусад хуулийн заалт руу буцаан оруулна гэсэн үг биш юм. Зөрчлийн тухай хуулийн баривчлах шийтгэл ногдуулах заалтыг 2017 оны нэмэлт өөрчлөлтөөр унагаасан. Хүн зодсон, биед нь халдсан зэрэг зөрчилд одоогийн Зөрчлийн тухай хуулиар ердөө 100 мянган төгрөгөөр торгох шийтгэл тусгасан байгаа нь буруу. Тиймээс энэ төрлийн зөрчлийг Эрүүгийн хууль руу оруулахаар хэлэлцэж байна.

Мөн Зөрчлийн тухай хуульд орох гэж байгаа хамгийн том өөрчлөлт бол дийлэнх зөрчилд сануулга өгөх тогтолцоог тусгах юм. Өөрөөр хэлбэл, хүний амь нас, эрүүл мэндэд шууд хор хохирол учруулахааргүй зөрчил гаргасан тохиолдолд эрх бүхий албан тушаалтнууд 7-10 хоногийн хугацаатай зөрчлөө арилгах албан шаардлага өгч, сануулдаг байхаар хуулийн төсөл бичигдэж байна” гэв.

Зөрчлийн тухай хуулийн шинэчилсэн найруулгын төсөлд тухайн нэг зөрчлийн шинж чанарыг харгалзан үзэж, торгуулийг дээд, доод хязгаартай болгох санал оруулжээ. Учир нь зарим төрлийн зөрчилд баривчлах шийтгэл ногдуулах шаардлага бий гэж үзэж буй аж. Мөн Зөрчлийн тухай хууль нь тодорхой санкцтай байх буюу хүлээх хариуцлагыг  тодорхой болгоно. Өөрөөр хэлбэл, торгуулийн шийтгэлийг 50-100 мянган төгрөг гэж бичиж, тусгана.

Түүнчлэн торгууль шийтгэлээ хугацаанд нь төлсөн тохиолдолд ногдсон шийтгэлийг 50 хувиар бууруулах эрх зүйн хөшүүргийг шинэчилсэн найруулгад тусгах аж.