Б.Пүрэвдорж: Жил бүр нэрээ өөрчилж, хуурамч бүтээгдэхүүн үйлдвэрлэдэг ганцхан компани байгаа

Төсвийн байнгын хороо өнөөдөр хуралдлаа. Тус хуралдаанаар УИХ-ын гишүүн Б.Пүрэвдоржийн санаачилж, өргөн барьсан “Онцгой албан татварын тухай хуульд нэмэлт өөрчлөлт оруулах тухай хуулийн төсөл”-ийг хэлэлцсэн юм. Тодруулбал, нефтийн дайвар бүтээгдэхүүнд онцгой албан татвар ногдуулах өөрчлөлт оруулахаар болсон аж. Энэ үеэр байнгын хорооны гишүүдийн хооронд болж өнгөрсөн асуулт, хариултаас хүргэе.

УИХ-ын гишүүн Тэмүүлэн: Хуулийн дагуу олон улсын жишигт нийцсэн түүхий эд бүтээгдэхүүн оруулж ирэх, хадгалах, хамгаалах, хяналт тавих үүрэг Засгийн газарт байгаа. Мөн Уул уурхайн яам, Мэргэжлийн хяналтын ерөнхий газарт бий. Ийм байхад газрын тосны үйлдвэрлэлийн дайвар бүтээгдэхүүнийг биензин үйлдвэрлэхэд ашиглаж байгаа үйлдлийг Уул, уурхайн яам яагаад зөвшөөрдөг юм бэ. Хоёрдугаарт энэ “найрка” үйлдвэрлэж байгаа газрын тосны үйлдвэрлэл, стандартыг яагаад зөвшөөрдөг вэ. Би хувьдаа үйлдвэрлэлийн ийм стандарт байхгүй гэж бодоод байгаа юм. Манай улс газрын тосны нэг ч үйлдвэргүй байхад энэ төрлийн дайвар бүтээгдэхүүн оруулж ирэх шаардлага хэрэгцээ байгаа юм уу.

УУХҮЯ, ГТБХЗХ-ийн дарга Ч.Чулуунбат: Монгол Улсад импортоор газрын тосны бүтээгдэхүүн оруулж ирэхэд ямар нэгэн хориглосон зүйл байхгүй.  Гишүүний дурдсан дөрвөн төрлийн бүтээгдэхүүн бол Монгол Улсын MNS 2017,2020 онд баталсанд стандарт байгаа. Үүнийг олон улсад ч хэрэглэдэг. Үйлдвэрлэлийн тусгай зөвшөөрлийг Газрын тосны тухай хууль болон Аж ахуйн нэгжийн тусгай зөвшөөрлийн хуульд заасан долоон аж, ахуйн нэгжид олгосон байна. Өнөөдрийн байдлаар Мэргэжлийн хяналтын газраас дээрх газруудын үйл ажиллагаатай холбоотой санал гомдол ирээгүй байгаа болохоор эдгээр аж ахуйн нэгжийн үйл ажиллагааг цуцлах чадахгүй өдийг хүрсэн.

Мөн энэ үеэр УИХ-ын гишүүн Б.Пүрэвдорж “Манай улс дөрвөн төрлийн дайвар бүтээгдэхүүн оруулж ирдэг бөгөөд өнгөрсөн онд 210 мянган тонн импортлосон. 2012 онд манай улсын цэвэр хэрэглээ 2000 тонн байсан. Тэгвэл хуурамч бүтээгдэхүүн үйлдвэрлэснээс хойш энэ хэмжээнд хүрсэн байна. Энэ бизнесийг хийдэг ганцхан компани байгаа. Энэ компани жил бүр нэрээ өөрчилж импорт хийдэг. Өөрөөр хэлбэл, тогтмол нэрээ сольдог гэсэн үг. Энэ компани өнгөрсөн жил гэхэд л 60 орчим тэрбум төгрөгийн татвараас зайлсхийсэн” хэмээн мэдэгдэв.

Төсвийн байнгын хороо уг хуулийн төслийг хэлэлцээд Онцгой албан татварын тухай хуульд нэмэлт өөрчлөлт оруулах тухай хуулийг 2021 оны наймдугаар сарын 1-ний өдрөөс эхэлж дагаж мөрдөх саналтайгаар УИХ-д шилжүүллээ.