ТАЙЛАНГАА ТАВИХАД ТАВХАН ХОНОГ ҮЛДЛЭЭ, БЭЛЭН ҮҮ ЕРӨНХИЙ САЙД Л.ОЮУН-ЭРДЭНЭ ЭЭ

2021-05-04, 859

Үе үеийн Засгийн газрын Ерөнхий сайдууд ажлаа хүлээж авснаасаа хойш 100 хоногт хийсэн ажлуудаа ард түмэнд тайлагнаж, дүнгээ тавиулж ирсэн. Тэгвэл Монгол Улсын 32 дахь Ерөнхий сайд Л.Оюун-Эрдэнийн Засгийн газар 100 хоногийн тайлангаа танилцуулахад тавхан хоног үлдлээ.

Тэр өнгөрсөн 100 хоногт энэ гэж бариулах, тэр гэж харуулах ажил хийсэн эсэх, хийсэн бол хэчнээн ажил хийснийг нь ард түмэн нягталж, дүн тавих цаг айсуй гэсэн үг.

У.Хүрэлсүх гэхэд л Монголын улсын 30 дахь Ерөнхий сайдаар томилогдож, Засгийн газар тэргүүлсэн эхний 100 хоногийн тайлангаа “30 чухал ажил” нэртэйгээр танилцуулж байв. 30 дахь Ерөнхий сайд У.Хүрэлсүх 30 ажил тайлагнаж байсан юм чинь 32 дахь Ерөнхий сайд Л.Оюун-Эрдэнэ 32 ажил тайлагнахгүй бол боломгүй санагдах. Тэгэхгүй бол У.Хүрэлсүхийг бодвол залуу, эрч хүчтэй, эрдэм боловсрол Харвардад эзэмшсэн гэгдэж, баахан магтуулсан Л.Оюун-Эрдэнэ У.Хүрэлсүхээсээ муу харагдана.

Тэгвэл Ерөнхий сайд Л.Оюун-Эрдэнэ болон түүний танхимын сайд нарт “Өнгөрсөн 100 хоногт манай Засгийн газрын хийсэн ажлууд энэ” гэж тайлагнах ямар ажлууд байгаа вэ. Уг нь Л.Оюун-Эрдэнэ Ерөнхий сайд болсон эхний хэдэн өдрөө дуусаж, дундаршгүй эрч хүчтэй мэт л байсан. Өглөө бүр 07:00 цагт хувь, хувьсгалынхныг цуглуулан уулзаж, “надад тулах цэг өг, би дэлхийг өргөе” гэх маягийн уриалга ярьж явсан. Тэр эрчээрээ явсан бол өдийд 100 хоногийн тайландаа 100 ажил дурайтал бичих хангалттай боломжтой байх байсан биз. Харамсалтай нь, төд удалгүй түүний эрч хүч, эртэч зан нь унтаарч орхисон. Одоо эргээд харвал ард түмэн Ерөнхий сайд Л.Оюун-Эрдэнийн Засгийн газрын өнгөрсөн хугацаанд хийсэн ажлуудаас вакцинжуулалт эхлүүлсэн, 10 их наядын хөтөлбөр хэрэгжүүлж эхэлсэн, иргэн бүрд 300 мянган төгрөг тараасан, С.Зоригийн хэргийг нууцаас гаргах болсон гэх гурав, дөрөвхөн ажлыг нь л нэрлэж чадахаар байна. Гэхдээ энэ ажлууд нь бүрэн хийгдсэн бус эхлүүлсэн төдий л байгаа. Тиймээс 100 хоногийн тайлан нь хэдхэн хуудас нимгэн, бас “эхлүүлсэн” гэх үгсээр л дүүрэн байх нь бололтой.

Жишээ 1. Л.Оюун-Эрдэнэ Ерөнхий сайдаар томилогдож, танхимаа бүрдүүлж, тангаргаа өргөснийхөө дараа УИХ-ын чуулганы индэр дээрээс “...Миний бие өнөөдөр чихэр мэт сайхан зүйл ярихгүй. Манай Засгийн газар “КОВИД-19” цар тахлыг даван туулах чиглэлд цогц төлөвлөгөө боловсруулж, шуурхай ажиллах болно. Хүн амаа вакцинжуулах нь бидний нэн тэргүүний зорилт байх болно. Цар тахлын голомтод ажиллаж буй ажилтан, албан хаагчид, эрсдэлтэй бүлгийнхэн, цаашлаад нийт иргэдээ ДЭМБ-ын зөвшөөрсөн вакцинд үе шаттай хамруулах ажлыг Засгийн газар өөрийн эхний 100 хоногт багтаан зохион байгуулахын тулд бүхий л нөөц боломжоо дайчлан ажиллах болно...” хэмээж байлаа. Өөрөөр бол, эхний 100 хоногтоо багтаан нийт иргэдээ ядаж эхний тунд, чадвал хоёрдугаар тунд хамруулж дуусгана гэж мэдэгдэж байв. Гэвч өчигдрийн байдлаар коронавирусийн эсрэг вакцины нэг болон хоёрдугаар тунд хамрагдсан хүмүүсийн тоо нийлээд 1,3 сая буюу тал хувьдаа хүрч байгааг ЭМЯ-наас мэдээлсэн. Өөрөөр хэлбэл, эхний 100 хоногтоо багтааж нийт иргэдээ вакцинжуулах амлалтаа хараахан биелүүлж амжихгүй нь тодорхой болж, 100 хоногийн тайландаа “вакцинжуулалт эхлүүлсэн” гэж л бичих нь бололтой.

Жишээ 2. Ерөнхий сайд Л.Оюун-Эрдэнэ, Хууль зүй, дотоод хэргийн сайд Х.Нямбаатарыг дагуулан олон улсын эмэгтэйчүүдийн эрхийг хамгаалах өдөр хорих ангийн эмнэлэгт очиж, С.Зоригийн амь насыг хөнөөсөн хэргээр ял эдэлж буй Т.Чимгээтэй уулзаж, хэвлэлийнхний өмнө хэсэг уйлуулсан. Үүнийхээ дараа Т.Чимгээ нарын хэргийг сэргээн шалгах, эрүүдэн шүүлгэсэн эсэхийг нь тогтоох, С.Зоригийн хэргийг нууцаас гаргах тухай удаа дараа сүржин мэдэгдлүүд хийсэн. Энэ хэрэгтэй холбоотой бүхий л нотлох баримтуудыг өнөө маргаашгүй нууцаас гаргаж олон нийтэд нээлттэй үзүүлээд л, өдий 20 гаруй жил хав дарагдсан хэргийн жинхэнэ үнэнийг ил болгох нь гэх ойлголтыг ард түмэнд үлдээсэн. Тэгээд л мартаж орхисон. Ингэхээр С.Зоригийн хэргийг нууцаас гаргах асуудлыг мөн л эхлүүлээд хаячихсан болно биз дээ. Тэгэхээр тайланг нь тахлах ажил бас л биш болж таарч байгаа юм.

Түүнчлэн, Ерөнхий сайд Л.Оюун-Эрдэнэ л өөрөө вакцин ярьж телевиз, радио, хэвлэлээр гараад байхаас биш бусад сайдуудынх нь царай өнгөрсөн 90 гаруй хоногт огт үзэгдсэнгүй. Яах вэ, Сангийн сайд Б.Жавхланг 10 их наядын хөтөлбөр хэрэгжүүлж эхлэх болсныг зарлахад нь, иргэн бүрд 300 мянган төгрөг тараахад нь тус бүр нэг удаа, Шадар сайд С.Амарсайхан, Эрүүл мэндийн сайд С.Энхболд хоёрыг хамтад нь хоёр удаа хатуу хөл хорио тогтоож, нэг удаа сунгахад нь тус бүр нэг удаа, Хууль зүй, дотоод хэргийн сайд Х.Нямбаатарыг хорих ангийн эмнэлэгт очиж Т.Чимгээтэй уулзаж, уйлуулахад нь нэг удаа л харсан байх.

Харин энэ дөрвөн сайдаас бусад 10 гаруй сайдынх нь сүүдэр нь ч үзэгдээгүй шахуу.

Ингээд харвал Ерөнхий сайд Л.Оюун-Эрдэнийн Засгийн газрын 100 хоногийн тайлан тун хангалтгүй гарч, ард түмнээс сайндаа л дунд үнэлгээ авах нь бололтой.

ТАЙЛАНГАА ТАВИХАД ТАВХАН ХОНОГ ҮЛДЛЭЭ, БЭЛЭН ҮҮ ЕРӨНХИЙ САЙД Л.ОЮУН-ЭРДЭНЭ ЭЭ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.eccold.top хариуцлага хүлээхгүй.