Жишээ нь, УИХ-ын 75 гишүүний 55 нь 9911-тэй дугаар, ес нь 9900, 9905,9909, 9910-тай дугаар, дөрөв нь 8811, 8888-тай дугаар, хоёр нь 9191-тэй дугаар тогтмол хэрэглэж байна. Зөвхөн 9911-тэй нэг дугаарын зах зээлийн ханш нь  дунджаар 80 сая төгрөг аж. Хэрвээ сүүлийн дөрвөн орон нь ижил буюу алтан, мөнгөн, эсвэл өссөн дараалалтай бол дээд тал нь 200 сая төгрөгийн үнэтэй. 9911-тэй дугаартай 55 гишүүнээс С.Бямбацогт, Б.Дэлгэрсайхан, Ж.Мөнхбат, Б.Пүрэвдорж нарын утасны дугаар бусдаасаа үнэтэй буюу дунджаар 150 орчим сая төгрөгөөр үнэлэгдэнэ. Тэгвэл 9911-тэй 55 ширхэг дугаарыг хамгийн багаар буюу 80 сая төгрөгөөр тооцож үзвэл 4.2 тэрбум төгрөг болж байна. Үүн дээр дээрх дөрвөн гишүүний утасны дугаарын үнийн зөрүүг нэмбэл 4.5 тэрбум төгрөг болж байгаа юм. Цаашлаад 9900,9905, 9909, 9910, 8811, 8888 дугаарын үнэлгээг нэмбэл таван тэрбум хангалттай давна. 

УИХ-ын нэг гишүүний гар утасны дугаар л гэхэд төр болон хувийн хэвшилд ажилладаг, жирийн иргэний 11 жилийн цалинтай тэнцэх үнэтэй байна гэхээр хямрал ярих утгагүй ч юм шиг. Өөр нэг зүйл нь, УИХ-ын гишүүд нэг битгий хэл нэлээд хэдэн гар утас, бүх үүрэн телефоны алтан, мөнгөн, тусгай дугаар, тэр битгий хэл бүртгэлгүй дугаарыг олноор нь ашигладаг. Энэ тохиолдолд гишүүдийн ганц дугаараар жишээ авч байгааг онцлох хэрэгтэй. Өдгөө Төрийн ордонд заларч буй УИХ-ын 55 гишүүний 9911-тэй дугаарыг зах зээлийн хамгийн доод ханшаар зарахад л улс 4.5 тэрбум төгрөгтэй болж болох нь. Магад, УИХ-ын гишүүд тойргийнхоо сонгогч бүр рүү, өдөр болгон 9911-тэй дугаараасаа залгаад “Ахуй, амьдрал нь яаж байна” гэж асуудаг байсан бол тийм чухал харилцаа, холбооны хэрэгслийг нь илүү үзээд байх шаардлага алга. 

4.5 тэрбум төгрөгөөр монголчууд юу хийж болох вэ. Коронавирусийн халдвартай нэг иргэний эмчилгээнд найман сая төгрөг зарцуулж байгаа гэгдэж буй. Тэгвэл 4.5 тэрбум төгрөгөөр 592 хүний эмчилгээний зардлыг төлж болно гэсэн үг. Эсвэл коронавирусийн хямралд өртөж, хаалгаа барих дээрээ тулаад байгаа есөн аж ахуйн нэгжид тус бүрт нь 500 сая төгрөгийн зээл, дэмжлэг болгоод өгч болно. Хэрвээ тэгвэл тухайн аж ахуйн нэгжүүд буцаад хөл дээрээ зогсож, хэдэн арван ажлын байр хадгалагдаж үлдэнэ. 

 

Энэ бүхнийг хийж болох мөнгө зүгээр л 55 ширхэг утасны сим болоод явж байна гэхээр төрийн түшээд ард түмэн биднээс зэрэг зиндаа хэр өндөр хүмүүс вэ гэдэг нь тодорхой харагдаж байгаа юм.