Ажлаа хүлээж аваад удаагүй байгаа аймаг, дүүрэг, сум, хорооны Засаг дарга нар коронавирус гэх аюулт цар тахлаас ард иргэдээ хамгаалах амаргүй сорилттой нүүр тулж байна. Өмнө нь Засаг дарга нар томилогдмогцоо ажилтайгаа танилцах гэж нэг жил, ард иргэддээ өөрийгөө таниулах гэж хоёр жил  явсаар дөрвөн жилийн албаа дуусгадаг байсан. Харин коронавирусийн аюул заналхийлж байгаа энэ үед томилогдсон Засаг дарга нарт тийм эрх, сонголт, цаг хугацаа байхгүй. Чухамдаа цар тахлын энэ үе ажлаа мэддэг, ард иргэдийнхээ төлөө ажиллах Засаг дарга нарт өөрийнхөө юу чаддагийг, ямар арга барилтай, хэн бэ гэдгээ харуулах том боломж. Нөгөөтэйгүүр ажлаа мэдэхгүй, ард иргэдийн төлөө бус, амин хувийн ашиг сонирхлын төлөө ажиллах Засаг дарга нарт бусдад баалуулах, зэс нь цухуйх хүндхэн цаг хугацаа. Товчхондоо, Засаг дарга нарын хэн нь хэн бэ гэдгийг цар тахлын энэ үед мэдэж болохоор байгаа нь онцлууштай юм уу даа. 

         Тэгвэл Д.Азжаргалаар тулах уу гэж асуумаар өөр нэг Засаг дарга байгаа нь Баянзүрх дүүргийн Засаг дарга Н.Баярмөнх. Түүний удирдаж байгаа Баянзүрх дүүргээс коронавирусийн дотоодод алдсан анхны тохиолдол илэрч, улсаараа хатуу хөл хорионд орсон. Хөл хорио тавигдаад долоохон хонож байхад тус дүүргийн нэгдсэн эмнэлэгт коронавирусийн голомт бий болж, нийслэл хоёр дахь удаагаа хатуу хөл хорионд шилжээд байна. 

 

Мөн Баянзүрх дүүргийн нутаг дэвсгэрт байдаг “Цагаан даваа” хогийн цэгийн ажилтан коронавирусийн халдвар авсан нь тогтоогдоод байна. Өчигдрийн байдлаар дүүргийн хэмжээнд 140 тохиолдол бүртгэгдээд байгаа гэх. 

     Тус дүүргийн нутаг дэвсгэрээр автомашинтай нэг бүтэн тойрход нэг ч цагдаа зогсоогоогүй нь түүний гаргасан захирамж хөрсөн дээр бус, цаасан дээр л байсны нотолгоо ч байж болох. Эцэст нь, Баянзүрх дүүргийн удирдлагууд хэт назгай байж, шаардлагатай арга хэмжээг цаг алдалгүй аваагүйгээс коронавирусийн халдвар тус дүүргийн Нэгдсэн эмнэлгээс айл хүртэл бүх шатанд тархлаа. Үүнээс болж, олон нийтийн сүлжээнд зарим иргэн “Баянзүрх дүүрэг Монголын Ухань боллоо. Дүүрэгт нь бензин асгаад шатаа” гэж хүртэл чичилж байх жишээний. Уг нь Баянзүрх дүүргийн Засаг дарга Н.Баярмөнх өмнө нь тус дүүргийн Засаг даргын орлогчоор ажиллаж байсан нэгэн. Мөн өнгөрсөн дөрвөн жил дүүргээ төлөөлж, НИТХ-д суусан туршлагатай. Тэрбээр ажлын гараагаа Дархан-Уул аймгийн Цагдаагийн хэлтэст эргүүлийн цагдаагаар эхэлж, хожим нь “Газарчин” дээд сургуулийг хэл судлал мэргэжлээр төгссөн байна. 2008 онд МАН-ын Бага хурлын гишүүн болж, 2012 онд Баянзүрх дүүргийн ИТХ-д сонгогдсоноор тус дүүрэгт “уяатай” болсон. Баянзүрх дүүрэгтэй найман жил холбоотой яваа түүнд дүүргийн хаана нь эрсдэлтэй, хаана нь ямар зохион байгуулалт  хийх шаардлагатай гэх мэтчилэн мэдэгдэхүүн бусдаасаа илүү байх ёстой. Өөрөөр хэлбэл, тэрбээр Баянзүрх дүүрэгт огт шинэ хүн биш бөгөөд ард иргэдийн төлөө ажиллах сэтгэл байвал Засаг даргын ажлыг мэдэхгүй гэх шалтаг түүнд байхгүй гэсэн үг. Даанч түүнд ард иргэдээ аюулаас бүрэн хамгаалах сэтгэл, зүтгэл, удирдлагын арга барил сох дутаж байна. 

       2012-2016 оны хооронд удирдсан Засаг дарга нь бас л дорвитой ажил хийгээгүй. 2016 оны сонгуулиар тус дүүрэгт будлиан гарснаас болж, хоёр жил орчим Засаг даргагүй байсан. Энэ удаад “Маргаан, будлиан гарсангүй, ашгүй Засаг даргатай боллоо” гэж баярлатал өнөө Засаг дарга нь “КОВИД-19”-ийн эсрэг арга хэмжээ авахын оронд өрөө, тасалгаагаа тохижуулж, коронавирусээс сэргийлэх, дүүргийн онцгой комисс хуралдаж буй төдий сэрэмжлүүлэг мэдээллээ өнгөлөг гэгч нь аргагүй уран сайхны видео нэвтрүүлэг маягаар зориуд бэлтгүүлэн, түүнийгээ фэйсбүүкийн шууд дамжуулалт болгон цацаж сууна. 

Тэр өдийд гэртээ орох завгүй урьдчилан сэргийлэх арга хэмжээ авч, халдваргүйжүүлэлтээ ч болтугай хийлцээд гүйж байх үүрэгтэй юм