-Зэвсэгт хүчний салбар эзэнгүйдэж, дүрэмт хувцсаа зээлийн хямдралтай бараа болгочихоогүй л юм бол цэргийн дүрэмт хувцсыг Зэвсэгт хүчинд нь үлдээнэ үү-

Захын сумын Засаг дарга, Засаг даргын орлогч, захиргааны ажилтан, хүнсний нярав, түгээлтийн борлуулагч, агуулахын манаач гээд хэн л бол хэн цэргийн дүрэмт хувцсаар гоёж, гангардаг болжээ. Гангарах ч гэж дээ, тэд бүхэл бүтэн тусгаар тогтносон Монгол Улсын Зэвсэгт хүчний дүрэмт хувцсыг өдөр тутмын хар бор ажилдаа өмсөж, үнэндээ бол Зэвсэгт хүчний салбарыг дапаалж байна шүү дээ.

Энд, тэндгүй эрээн хувцастай, эр, эм нь мэдэгдэхгүй эх орончийн дүрд тоглосон тохуурагчид бий болоод удлаа.  Зурагтаар гарч байгаа дарга, эргүүлд гарч байгаа хэн бүхнээс эхлээд цэргийн хувцсаар жигдрээд байгааг анзаарч байна уу. Эсвэл энэ эх оронд минь дайн болоод байгаа юм уу.

Гол нь өнөөдүүл нь хувцсаа зөв ч өмсөж чадахгүй юм. “Төрийн өмч, цэргийн эд хөрөнгө” гэх агуу нэр томъёотой цэргийн хувцсыг эх орноо хамгаалахаар тангараг өргөсөн алба хаагчдын хувцас биш, хөдөө явахдаа, хүнс тараахад, хүнтэй уулзахад өмсөх ёстой гэж хэн хэлчихсэн юм бол. Угтаа бол цэргийн алба хаагч дүрэмт хувцсыг өмсөхдөө чанга хатуу дүрмийн дагуу өмсөх үүрэгтэй байдаг. Жишээ нь, Эмэгтэй цэргийн алба хаагч гэхэд л дүрэмт хувцсаа өмсөх үедээ нүүр болон хумсаа тод өнгөөр будах, содон ээмэг зүүхийг нь хориглодог. Мөн хар өнгийн үсний боолт хэрэглэхийг нь хүртэл хатуу тогтоож өгдөг. Энэ ердөө л наад захын жишээ, шаардлага нь. Гэтэл УИХ-ын хурлын гишүүн нь хүртэл энэ дүрэмтээр эв хавгүйхэн гангарчихаад, хөлөндөө пүүз углачихсан гүйж явах жишээтэй. Тэр болоогүй ханцуйг нь шамлаж, захыг нь босгоод өмсчихсөн ч байх шиг.

Угтаа цэргийн алба хаагч нь Монгол Улсын Ерөнхийлөгчийн зарлигаар баталсан загварын цэргийн дүрэмт хувцсыг өмсөж, цол, ялгах тэмдэг хэрэглэх журамтай. Бүр тодруулбал, “Цэргийн дүрэмт хувцас” гэж “Цэргийн жинхэнэ алба хаагч хуулиар хүлээсэн үүргээ биелүүлэх, цэргийн анги, байгууллагын цэргийн сургалт бэлтгэл, өдөр тутмын үйл ажиллагааг хангах, хувцаслалт, гадаад үзэмжийг жигдрүүлэхийн тулд батлагдсан төрөл, загвар, эдэлгээний хугацаа, хангалтын нормоор хүн нэг бүрт олгогддог хувцас, хэрэглэлийг хэлнэ” томъёолжээ. Харин дүрэмт хувцсыг бусад байгууллага, иргэн хэрэглэх, тэдгээрийн загварыг ашиглахыг хориглодог.

Монгол Улсын Ерөнхийлөгч, Зэвсэгт хүчний ерөнхий командлагч аа, Зэвсэгт хүчний анги, бүрэлдэхүүн чинь хувцсаа зарж идэтлээ үгүйрээгүй л байлтай. Эсвэл дүрэм журам гэдгийг мэдэхээ байтлаа эзэнгүйдэж, энэ салбар гудамжинд гарах дээрээ тулчихсан хэрэг үү.

Иймээс хэдэн бор цэргийнхээ  “Эх орноо батлан хамгаалагч дайчин би...” хэмээн бардах, омогших нэгэн шалтгаан “Гол зураасгүй, хир битгий хэл ширхэг ч үсгүй өмсөх сөн” гэж өөрөөсөө илүү хайрлан гамнадаг дүрэмт хувцсыг нь хаа сайгүй, юунд ч хамаагүй эгэлдэргэлэж яваа дарга даамлууд тэргүүтэй тэдний ойр тойрныхноос “буцаан авч” өгнө үү. Зэвсэгт хүчний салбар эзэнгүйдэж, дүрэмт хувцсаа зээлийн хямдралтай бараа болгочихоогүй л юм бол цэргийн дүрэмт хувцсыг Зэвсэгт хүчинд нь үлдээж өгнө үү.