Хүчирхийлэл үйлдсэн гэх ламхай нарт холбогдох хэргийн шүүх хурал өчигдөр болсон. Тодруулбал, ламхай нарын хэрэгт холбогдсон таван хүүхдийн дөрөвт хилийн хориг тавьж, нэг хүүхдийг 30 хоногоор цагдан хорих таслан сэргийлэх арга хэмжээ авсан юм. Хэргийг эргэн сануулахад өнгөрсөн зургаадугаар сард Гандантэгчэнлин хийдэд шавилан суралцаж байсан нэр бүхий ламхай нар бэлгийн хүчирхийлэлд өртсөн болох нь шүүх шинжилгээний байгууллагын дүгнэлтээр нотлогдсон байдаг. Тус хэргийг ЦЕГ-аас шалгаж, ламхай нарыг яллагдагчаар татах саналыг прокурорын байгууллагад долоодугаар сарын 19-нд ирүүлсэн байдаг.

Хэргийн талаар хохирогч хүүгийн ээж “Миний хүүг хүчирхийлж, хүүхдүүдийн эрх зөрчигдөж байна гэдгийг би удаа дараа холбогдох хүмүүс, хүүг минь болон ламхай хүүхдүүдийг хариуцаж байгаа багш нарт нь хэлж байсан. Гэсэн ч тэд миний үгийг үг гэж хүлээж аваагүй, хэлэлцээгүй. Энэ ёс бус үйлдлийг хүүхдүүд нүдээрээ харсан. Би яг үнэндээ ёс бус харьцаад байгаа хүүхдүүдтэй нь хүртэл уулзсан, арга ядахдаа. “Ингэж болдоггүй юм. Бид тэгш эрхтэй. Хүүхдийн эрхийг хамгаалах байгууллага бий” гэж хүртэл хэлсэн. Сургалтын орчин нь бохир заваан, хоол хоолойгоор давдаггүй шүү дээ. Орохын аргагүй, бие зараймаар газар байгаа юм. Би хүүхдээ дотуур байрнаасаа гараад, гэрээсээ сургуульдаа яв гэж хэлсэн чинь хүү минь "Энд байх нь өгөөжтэй, энд байж байгаад лам болдог гээд байгаа юм аа" гэж хэлсэн. Тэгээд би дахиад хүүдээ зааж, зааварчилж, албадаагүй. Алсаас хараад хянаад л явдаг байсан. Гэхдээ тэнд ороод үзэхээр ямар аймар гэж санана. Эх хүмүүс ороод үзсэн ч болоосой. Хүүхдүүд нэгнийгээ аймшигтайгаар зодож, тамладаг. Багш нар нь зоддог, жанчдаг. Би хүүхдээ хөдөө явъя гээд гуйсан ч “Багш нар Төвхөн хийд явуулна гэсэн, цагаан сүм рүү явна. Тэндээс мөнгө цуглуулж Энэтхэгт очиж сурна” гээд багш нартаа итгээд байгаад байсан. Багш нар нь хүүхдүүдэд худлаа ярьж, хуурч лам болгохын тулд уяад байсан юм билээ. Тэгээд миний хүү тэндээс гарч чадахгүй байгаад байсан.

 Тухайн хэрэг болдог өдөр хүү минь залгаад “Ээж хүрээд ир. Багш дуудаад байна” гэхээр нь яваад очтол ийм аймшигтай зүйл болсон байсан. Хүүгийн минь хажууд байсан Б гэх хүүхэд хэлэхдээ “Бид дөрөв хоносон. Гэтэл Ш гэх хүүхэд танай хүүхдийн ор руу хүчээр шээгээд, хөнжил гудсыг нь өөрийнхөө ор руу аваад, хамт унтуулах нэрээр хүүг чинь хүчирхийлж эхэлсэн” гэсэн. Би болсон бүх явдлыг сонсчихоод багш нарт нь хэлсэн. Гэтэл багш нь “Зүгээр дуугай хувцсаа аваад яв” гээд хүүхдийн маань эд хэрэгслийг хонгил руу гаргаж шидсэн. Надад үнэхээр хэцүү байсан. Арга бараад би цагдаа дуудаж, тэмдэглүүлсэн. Ш гэх хүүхэдтэй уулзахад “Эгч ээ, би шээсэн нь үнэн. Манай ээж өвчтэй учраас би энд байдаг. Би угаалгын нунтаг, савангийн мөнгийг нь өгье” гээд гуйгаад байсан. Би эх хүн учраас тэр хүүхдийг ойлгож, өрөвдсөн. Яг үнэндээ анхандаа хүчирхийлчихсэн гэж ойлгож чадахгүй, оронд нь шээгээд, дээрэлхсэн гэж бодсон. Гэтэл хүчирхийлсэн нь үнэн болж таарсан. Үнэхээр аймшигтай байна. Миний хүүгийн сэтгэл санаа маш хүнд байсан. Миний хүүг ийм болгосонд маш их гомдолтой байна. Гандангийн байгууллага өөрсдийгөө өмөөрч, мэдээлэл хийсээр байна. Гандантэгчилэн хийд бидэн рүү эргэж холбогдоогүй. Харин ч хүүхдэд маань сэтгэл санааны дарамтад оруулж байгаа. Миний хүүхэд хэнд ч итгэх итгэлгүй болоод байгаа. Миний хүү дэлгүүр ч орж чадахгүй, хоолоо хүртэл халбагдуулж идэж байна. Үүнээс улбаатайгаар СЭМҮТ-д эмчлүүлж, сэтгэл зүйн зөвлөгөө авахаар очиход нь гадны нөлөөтэй мансууруулах эм, тариа хийсэн. Би хүүгээ эргэхээр гурван удаа очиход хүүхдээ харж, уулзаж чадаагүй, сүүлийн удаа очиход хүүхэд маань мансуурсан байдалтай байсан. Юу ч мэдрэхгүй, хачин байсан. Тэгээд би “Миний хүүхдэд юу хийчих вэ” гээд хүүгийнхээ зургийг дартал СЭМҮТ-ийн таван эмч, сувилагч намайг зодож, маш хүнд гэмтэл учруулсан. Миний эрүүл мэнд маш их хохирсон. Ийм нөхцөл байдалд ороход намайг элдвээр хэлж, дайрч, хүн сэтгэлгүй хандаж байгаад маш их гомдож байна. Хүмүүс намайг худлаа ярьсан гэж байгаа ч шүүх нь шийдвэр гаргаж, хүүхдийг минь хүчирхийлсэн нь тогтоогдлоо.Хүний эрхийн үндэсний төв хэний талд ажиллаад байгааг мэдмээр байна, би хувьдаа хардаж байгаа. Над руу нэг ч яриагүй, хүүхдэд минь анхаараагүй” гэлээ.