Хүн намаас өнөөдөр Х.Баттулга гишүүнтэй холбоотой баримтын талаар мэдээлэл хийлээ.

      Энэ үеэр тус намын гишүүн Б.Найдалаа “Иргэдээс бидэнд Х.Баттулга гишүүнтэй холбоотой мэдээлэл ирсэн. 2006 оны гуравдугаар сарын 23-нд Женко группээс Х.Баттулга гэж хүн гарын үсэг зураад, "Daewoo International" гэх компаниар явуулсан албан бичиг байгаа юм. Албан бичиг бол компаниудын хооронд явдаг зүйл. Ноцтой зүйл нь Монголын бизнесийн салбарт 20 гаруй жилийн өмнө 10 сая долларын  "Номаранг"-ийн хэрэг гэж залилангийн маягтай хэрэг гарч байсан. Женко группээс явсан албан бичиг дээр "Номаранг"-тай холбоотой хариуцлагыг Монгол шуудан болон Голомт банк дээр нээсэн хохирлыг миний бие хүлээнэ гээд хүлээн зөвшөөрсөн байгаа юм. Энэ бол тухайн хэргийг тодруулах, цаашлан нарийвчлан шалгах, гэм буруутайг нь тогтоох, эргэн сэргээхэд ноцтой баримт учир дурдаж байна. Хамгийн ноцтой нь энэ албан бичигт "Монголын байгалийн баялаг, нөөц нь тогтоогдсон ордуудыг зарья, зарж байна", "Хятад талын худалдан авагч олж өгөөч” гэсэн маягтай хүсэлт байгаа юм. Энэ бол Төгрөг нуурыг зарсантай холбоотой байж болзошгүй учир ноцтой гэж үзэж байна. Мөн 2006 онд энэхүү бичгийг үйлдэж байхдаа бичиг явуулсан хүн нь УИХ-ын гишүүн байсан. Гишүүн өөр ажил хийж болдоггүй" гэв..