Улсын Их Хурлын гишүүн Д.Ганбатыг Ардчилсан намын даргад бүртгүүлэхээр материалыг нь Улсын дээд шүүхэд хүргүүлж байгаа талаар намын гишүүд нь мэдээлэл хийлээ.

      Тэдний зүгээс “Ардчилсан намын даргаар сонгогдсон Д.Ганбатыг Ардчилсан намын даргаар бүртгүүлэх хүсэлтийг Улсын дээд шүүхэд хүргүүллээ. Манай намын төв байгууллага бүхий ҮБХ-ны нэгдүгээр сарын 25-ны хурлаар Ардчилсан намын дарга С.Эрдэнэ хүсэлтийн дагуу Ардчилсан намын даргыг сонгох сунгаа зарласан. Сунгаанд, Ардчилсан намын 200 мянган гишүүнээс 143.500 гишүүн санал хураалтанд орсон. Даргын сунгаанд долоон нэр дэвшигч дэвшсэнээс Ардчилсан намын даргаар хамгийн өндөр буюу 22 мянган хүний санал авч, Д.Ганбат гишүүнийг АН-ын даргаар сонгосон. Өнгөрсөн долоо хоногийн бүтэн сайн өдөр болсон Ардчилсан намын ээлжит бус арван зургаадугаар их хурлаар намын даргыг ёсчлон батламжсаны дагуу өнөөдөр УДШ-д материалаа хүргүүллээ” гэв.