Нам дагаж, жагсаалтад багтсан “шинэков”-уудаас одоогоор хэл аманд өртөөгүй хэнд ч, анзаарагдаагүй хэдэн гишүүн бий. Тэр тусмаа “Үндэсний эвсэл”, ХҮН, ИЗНН намаас жагсаалтад багтагсдаас өнөөдрийг хүртэл хэнд ч танигдаагүй гишүүн олон.Тэдний нэг нь ИЗНН-аас жагсаалтад багтаж, Их хуралд суусан Ринчиндоржийн Батболд. Улс төр, бизнесийн салбарт сураггүй тэр гэнэт УИХ-ын гишүүн болж, төрд “тооноор” орж ирсэн. Ааваараа Төв аймгийн Эрдэнэсант сумын уугуул, эдийн засагч мэргэжилтэй.Тэрбээр “Разноимпэкс” ХК-д менежер, “Эйртранс” ХХК-д нягтлан бодогч, “Би Эм Би Икс” ХХК –ийн захирал, Хөдөө аж ахуйн бирж ХХК-д аудитор, “Ти Пи Эм Смарт Системс” ХХК-ийн зөвлөхөөр ажилласан намтартай.

Р.Батболд жилийн 196 сая төгрөгийн орлоготой, 200 саяын нэг орон сууц, 75 сая төгрөгийн Land Cruiser 200 маркийн  машинтай,  “Ти Пи Эм Смарт Системс” ХХК, “Галилео Монгол” ХХК, “Хан Харгант” ХХК-д хувьцаа эзэмшдэг гэж хөрөнгө орлогоо мэдүүлсэн байна. Түүний эзэмшдэг “Ти Пи Эм Смарт Системс” ХХК, “Галилео Монгол” ХХК-ийн гүйцэтгэх захирлаар эхнэр Туяагийн Биндэръяа нь бүртгэлтэй.

“Би Эм Би Икс” ХХК-ийг  түүний ах Ринчиндоржийн Ариунболд нь эзэмшдэг. Тус компанийг 2006 онд гадаад худалдааны чиглэлээр байгуулж, 2016 оноос Р.Ариунболд эзэмших болсон. Түүнчлэн 2012 онд Тариалан эрхлэлтийг дэмжих сангаас Р.Ариунболд “Хорго хайрхан” ХХК-аараа дамжуулан 29.2 сая төгрөгийн урамшуулал авсан байдаг. Улмаар “Хорго хайрхан” компаниа 2019 онд “Монгол даатгал” компанитай нэгтгэсэн. Ингээд Р.Ариунболд 2017 он хүртэл “Монгол даатгал” ХК-ийн хувьцаа эзэмшигчдийн нэг байсан бөгөөд нээлттэй хувьцаат компани болоход нь хувьцаа эзэмшигчээс хасагдсан байдаг.   Үндсэндээ УИХ-ын гишүүн Р.Батболдын ах, дүү нараас хувьдаа аж ахуйтай ганц нь түүний том ах Р.Ариунболд. Гэвч Р.Ариунболдын эзэмшлийн компани өнөөдрийг хүртэл “цүнхэндээ тамга”-тай, улсын бүртгэлийн гэрчилгээтэй гэдгээс хэтрэхгүй, тодорхой үйл ажиллагаа явуулдаггүй. Эндээс харахад тэрбээр улс төрд орохын тулд намтраа нэмж, ахынхаа нэр дээр бүртгэлтэй компаниудад захирлаар ажилласан гэх албан тушаалын гуншин нэмсэн байх магадлалтай байна. Угтаа бол агаарын тээврийн тийзний “борлуулагчаас” УИХ-ын гишүүн болоход тун нимгэн намтартай тул түүнийгээ баяжуулсан байхыг үгүйсгэх аргагүй юм.

Харин түүний том эгч Р.Ариунсанаа нь ЭХЭМҮТ-ийн асрагчаас  их эмч болсон намтартай. Ах, дүү нараас нь эгчийг нь тодотгосны учир нь 2024 оны сонгуулиар Р.Батболд өөрөө ИЗЗН-ын жагсаалтад багтаж, төрсөн эгчийгээ УИХ-ын сонгуулийн V тойрог, Төв, Дархан-Уул, Сэлэнгэ аймагт “сойсон” байдаг. Хоржоонтой нь, Р.Ариунсанаа УИХ-ын сонгуульд нэр дэвшихдээ хэнээс ч хандив аваагүй, сонгуулийн санхүүжилт нь ч тодорхойгүй байна. Ийн жагсаалтад багтахын тулд төрсөн эгчийгээ хүртэл сонгуульд өрсөлдүүлж, дэмжлэг авах хүртлээ  Р.Батболд улс төрд улайрч байгаагийн ард чухам ямар эрх ашиг байгаа вэ гэдэг нь анхаарал татаж байна.

Р.Батболдын ард Ардчилсан намынхан, тэр тусмаа хуучин лидерүүд нь бий гэгддэг. Тодруулбал, Р.Батболдын туслахаар ИЗНН-ын гишүүн Тогоочийн Бат-Эрдэнэ ажилладаг. Түүний хувьд хуучин АН-ын гишүүн. Ардчилсан намын Хэрэг эрхлэх газарт Тамгын газрын дарга хийхээс эхлээд л АН-ыг төлөөлж НИТХ-д сууж байлаа. Мөн 2012 онд хотын дарга Э.Бат-Үүлийн Экологи, ногоон хөгжлийн асуудал хариуцсан орлогч даргаар ажиллаж байлаа. Одоогийн ИЗНН-ын удирдлагууд тэр чигтээ АН-д бойжиж, тэндээсээ өрх тусгаарласан. Тэдний нэг нь Тогоочийн Бат-Эрдэнэ. Өдгөө УИХ-ын гишүүн Р.Батболдын зөвлөх нэртэй боловч түүний кноп хэнд “үйлчлэх” вэ гэдгийг шийддэг гол хүн нь болжээ.

Мөн ИЗНН-ын одоогийн дарга Батын Батбаатар ч гэсэн АН-ын гишүүн байлаа.  Эндээс ИЗНН гэх улс төрийн хүчин парламентад суудалтай болсон ч үнэн хэрэг дээрээ гишүүдийн олонх нь Ардчилсан намынхны эрх ашгийг хамгаалж байгаа нь илэрхий байна.