Цаг үеийн асуудлаар Хууль зүй, дотоод хэргийн сайд О.Алтангэрэл сэтгүүлчдэд байр сууриа илэрхийллээ.

         Тэрбээр "Засгийн газрын хурал дээр үүсээд байгаа нөхцөл байдлын талаар ярилцлаа. Бүх сайд үгээ хэлж, өнгөрсөн хугацаанд хийж, хэрэгжүүлсэн ажил, цаашид юун дээр анхаарах талаараа ярилцсан. Ерөнхий сайдын хувьд бусад сайдынхаа санаа бодлыг сайн сонсож байх шиг байна. Сайд нарын зүгээс "Хамтарсан Засгийн газар үр дүнтэй. Олон том төслийн ард гарсан. Хийж хэрэгжүүлсэн ажлаа хийхээр нэлээд эрч хүчтэй ажилласан" гэх байр суурийг илэрхийлж байна. УИХ-руу итгэл үзүүлэх тогтоолын төсөл оруулах нь Ерөнхий сайдын бүрэн эрхийн асуудал байдаг. Л.Гантөмөр даргын хувьд "Хамтарсан Засгийн газарт Ардчилсан намаас ажиллаж байгаа найман сайд өөрсдөө чөлөөлөгдөх өргөдлөө бичнэ. Төслийг нь бэлд" гэж надад хэлсэн. Бид бол бүлгийнхээ шийдвэрийг дагана. Угаас Засагт хамтрахдаа Үндэсний бодлогын хороо, Улс төрийн зөвлөл, Ардчилсан намын бүлгийн хурлаар шийдвэр гаргуулж орсон. Одоо ч гэсэн бүлгийнхээ шийдвэрийг дагана" гэв.