Төрийн ордонд "Эрүүдэн шүүлт тулгах, хүнлэг бус, хэрцгий хандахаас ангид байх хүний эрхийн хэрэгжилт" хүний эрх, эрх чөлөөг хамгаалахтай холбоотой УИХ-ын хяналтын сонсгол болж байна.

            Энэ үеэр Т.Чимгээгийн ах Т.Хүрэлбат "Миний дүү С.Зоригийн гэх хэрэгт холбогдоод таван жил есөн сарын ял эдэлсэн. Өөрөө өнөөдөр энэ танхимд сууж байгаа ч ярьж хэлж байгаагаа мартдаг, жаахан яаруулбал сандардаг, унадаг учир би өмнөөс нь ярьж байна. Энэ Т.Чимгээ, Б.Содномдаржаа гэж хоёр хүн зургаан жил С.Зоригийн хэрэг гэх хэрэгт яллуулаад, тухайн үеийн Тагнуулын байгууллагын зохион байгуулалт, прокурорын зөвшөөрөл, Шүүхийн шийдвэр гүйцэтгэлийн ажилтнуудын оролцоотойгоор яргалалт, тамлалд дундуур яваад гарсан. Гэтэл одоо ч эрүүдэн шүүлт нь үргэлжилж байна. Энэ жилийн аравдугаар сарын 2-нд С.Зориг агсны хөшөөн дээр очоод УИХ-ын гишүүн Ч.Лодойсамбуу энэ хэрэг илэрсэн гэх зүйлийг ярьсан. Улсын дээд шүүх, прокуророос энэ хэрэг хэрэгсэхгүй болоод тогтоол шийдвэр гарсан байхад УИХ-ын гишүүн өнөөдөр ард түмэнд ийм мэдээлэл өгөөд байж байна. Сахилгын хороо Ч.Лодойсамбуу гэх гишүүндээ арга хэмжээ авч өгөөч гэж хүсэж байна. Хоёрдугаарт, энэ эрүүдэн шүүлт Монгол Улсын шүүхээр үргэлжилж байгаа. Бид нөхөн төлбөрийн асуудлаар Баянзүрх дүүргийн иргэний хэргийн анхан шатны шүүхэд хандаад есөн удаа буцаачихаад байж байна. Үндэслэл нь Улаанбаатар хотод өглөө 9:00 цагт байхгүй бол шоронд хийнэ" гэдэг дарамтанд энэ улс гэр орон, хашаа, байшингаа орхиод, 90 настай хөгшин, гурван хүүхдээ аваад хотод ирсэн. Энэ хойгуур бид Т.Чимгээ зөвхөн амьд байх уу, үгүй юу гэдэг асуудалд бид тэмцэл хийгээд явж байсан. Энэ хугацаанд байшин нь золбин нохойны үүр болоод нурах нь нурсан байсан. Үүнийг нэхэхээр, "Яагаад үүнийг харилцан нэхэж байгаа юм" гэдэг. Нэг бол тэмдэгтийн хураамж төлөөгүй байна гэж байгаа юм. Гэтэл тэмдэгтийн хураамж төлөхгүй гэх хууль бий шүү дээ. Шүүх өөрөө хуультай юмыг хуульгүй гээд өөрсдийн итгэл үнэмшлээр асуудалд хандаж байна" гэв.