2025 оны төсвийн асуудлаар Эдийн засгийн хөгжлийн сайд Л.Гантөмөр мэдээлэл өглөө.

     Тэрбээр "2024 онд бүх хүний цалин нэмэгдсэн. Тэтгэвэр нэмэгдсэн, хоршоо руу зээл гарсан. Энэ зээлийн хүү нь төлөгдөнө. Мөн орон нутагт ажиллаж байгаа хүмүүсийн нэмэгдэл гэж гарсан. Ковидын үед халамж ихээр тэлсэн. Бид төрийн албаны давхардсан бүтцийг судалж байгаа. Эхний ээлжид давхардсан бүтцийг арилгаж байж төсвийн хэмнэлт гарна. Засгийн газар байгуулагдаад хоёр сарын хугацаанд боловсруулсан төсөв. Энэ хугацаанд үнэндээ давхардсан бүтцийг бүрэн гаргаж амжсангүй. Тэгэхээр төрийн албаны цогц шинэчлэлийг явцын дунд хийнэ. Төсөв хэлэлцүүлэх хугацаанд хоёр хэлэлцүүлгийн ард санал гаргаад, Засаг руу хандаж байгаа нь буруу. УИХ төсвөөс хасах бүрэн эрхтэй. Хамгийн гол нь хэний төсвийг хасах вэ гэдэг чухал. Боловсрол, эрүүл мэнд, хуулийнхны төсвийг хасаж, хоршоонд өгч байгаа төлбөрийг зогсоох юм уу, халамжаа хасах уу, ээжүүдийн мөнгийг өгөхөө болих юм уу. Манай төрд халамжийн зардал их байгааг бүгд мэдэж байгаа. Үүн дээрээ улс төрийн шийдлээ гаргах хэрэгтэй. Гишүүдийн баталсан хуулийн дагуу төсөв нэмэгдээд байгааг бүгдээрээ ойлгох ёстой. Тиймээс бид хугацаа аваад төрийн албаны шинэчлэлийг хийнэ. Энэ шинэчлэл хийгдэхээр хэнд ямар зардал гараад байгаа нь ойлгомжтой болно. УИХ дээр саналаа гаргаад төсвөө танах асуудлаа дэмж л дээ. Би урьд нь гишүүн байхдаа их хурал дээр төсвийн урсгалыг 10 хувь бууруулж байсан. Энэ удаагийн төсвийн баримталсан зарчим бол төсвийг сайн дураараа нэмэхгүй, хөрөнгө оруулалтыг дураараа нэмэхгүй, тойргийн мөнгийг өгөхгүй гэж байгаа. Өмнө нь тойргийн мөнгөний ард бүгд нуугдаж байсныг цөм мэднэ" гэв.