ЭНЭ МӨНГИЙГ СОНГОГДСОН ТОЙРГИЙНХ НЬ ЭМЗЭГ ДАВХАРГЫН ИРГЭДИЙН ХООЛ, ХҮНСЭНД ЗАРЦУУЛЪЯ-

        Цар тахлын харанга дэлдэж, нийтээр нь хөл хорионд оруулсан энэ өдрүүдэд иргэдэд хүнс, ахуйн хэрэгцээт бараа, бүтээгдэхүүн, бэлэн мөнгө юу юунаас хэрэгтэй байна. Түлээ нүүр, хоол, хүнс битгий хэл амны хаалт худалдаж авах бэлэн мөнгөгүй иргэд Монголоор нэг боллоо. Аж ахуйн нэгжүүд ч ажилчдаа цомхотгож, цалингаа тавьж чадахгүй, хаалгаа бүр мөсөн барихад хүрч байна. Засгийн газар наашаа гэсэн бүхэн рүү хандив, тусламж хүсэж, донор байгууллагууд аль чадлаараа хичээж байгаа гэх ч тодорхой шийдэл, иргэдэд хүрсэн бодит үр дүн хараахан алга. 

Гэхдээ гол нь ард иргэдийнхээ төлөө амь биеэ үл хайрлан зүтгэнэ гэж ам өчиг өгөн байж сонгогдсон УИХ-ын эрхэм гишүүдээс “КОВИД-19”-ийн үед авч хэрэгжүүлэх бодит санаачилга өнөөдрийг хүртэл гараагүй л байна. Тиймээс ийм нэг боломж байгааг УИХ-ын дарга, Ерөнхий сайд, Ерөнхийлөгчид сануулах гэсэн юм. 

           Тодруулбал, УИХ-ын гишүүн бүрд Засгийн газраас жил бүр өгдөг 250 сая төгрөгийг нэн тэргүүнд тусламж хэрэгтэй байгаа иргэддээ зориулъя. 

         УИХ-ын гишүүн, туслах, зөвлөхийн цалингаас гадна тэд жил бүр дунджаар 250 сая төгрөг авдаг. Ингэхдээ Шилэн дансанд бүртгэлгүй, Төрийн бус байгууллагаар дамжуулж авдаг нь ил болсон. Үүнийг МАН-ын бүлгийн дарга Д.Тогтохсүрэн “Заавал Төрийн бус байгууллагаар дамжуулах ёстой гэсэн сонин журам байдаг юм билээ” хэмээн тайлбарлаж байсан. Тэрхүү сонин журмаа өөрчлөх тухай гишүүд нэг ч үг дуугараагүй. Гишүүдийн туслахууд нь Төрийн бус байгууллага байгуулж, уг мөнгийг авдаг гэдэг. Тэгэхээр татвар төлөгчдийн мөнгийг УИХ-ын гишүүд тойрогтоо зарцуулах нэрээр хувьдаа ашигладаг байхыг ч үгүйсгэхгүй. Тиймээс энэ мөнгийг  УИХ-ын гишүүд энэ жилдээ тэвчээд, тойргийн иргэддээ зарцуулах хэрэгтэй байна. 

       УИХ-ын 76 гишүүн жилдээ ердөө энэ зориулалтаар 19 тэрбум төгрөг авдаг гэж тооцвол нэлээд өрхийн сарын хэрэглээг хангана. Өрх бүрд сая төгрөг тарааж хүрэхгүй юм аа гэхэд өдрийн орлогоороо амьдралаа залгуулдаг иргэдэд ямар их нэмэр болох бол.  Төсөв хүнд байгаа энэ үед гишүүд тойргийн иргэдээ бодож, 250 сая төгрөгөөсөө татгалзаж чадах болов уу. 

Д.Тогтохсүрэн “Заавал Төрийн бус байгууллагаар дамжуулах ёстой гэсэн сонин журам байдаг юм билээ” хэмээн тайлбарлаж байсан