УИХ-ын Төрийн байгуулалтын байнгын хороо Засгийн газрыг огцруулах асуудлыг хэлэлцэж байна. Энэ үеэр УИХ-ын гишүүн С.Амарсайхан “Нийгэмд үүссэн нөхцөл байдалтай холбоотойгоор Ерөнхий сайд У.Хүрэлсүх мэдэгдэл хийлээ. Юунаас эхэлж асуудал үүссэн бэ гэдгийг бүгд мэдэж байгаа. Амаржих газарт болсон сэтгэлгүй, цэвдэг сэтгэлтэй, шат шатанд үүрэлсэн хариуцлагагүй, ажил эзэнгүйдүүлдэг дунд, доод шатны хүмүүсээс болж энэ асуудал үүссэн. Эхчүүд, эмэгтэйчүүд эмнэлгийн байгууллагаас гарсан харгис үйл явдлыг эсэргүүцэж, жагссан. Харамсалтай нь, зарим улстөрч, сөрөг намынхан үүнийг шат шатанд улс төржүүлж, нийгмийн эмх замбараагүй байдлыг бий болгох, энэ дундаас цаг үеийн ашиг хонжоо олох сэдэл бий болгосон учраас Ерөнхий сайд үндэсний эрх ашиг, эв нэгдлийг бодож ийм шийдвэр гаргалаа гэж үзэж байна” гэлээ.