Б.ЖАВХЛАН: Одоогийн Засгийн газар өрийн хүндийг үүрч байна

2022-08-03, 933

Засгийн газрын ээлжит хуралдаан өнөөдөр боллоо. Энэ үеэр Монгол Улсад үүссэн өр бондын зарцуулалттай холбоотой Ажлын хэсгийн ахлагч Сангийн сайд Б.Жавхлан мэдээлэл өглөө.

Тэрбээр “Өнөөдрийн Засгийн газрын хуралдаанаар өнөөдрийг хүртэлх Монгол Улсын Засгийн газраас гаргасан бондын зарцуулалтыг шалгах ажлын хэсгийг байгууллаа. Өчигдрөөс эхлэн Засгийн газрын гишүүд бид хэвлэл мэдээллээр дамжуулан Монгол Улсын Засгийн газрын хувьд ойрын гурван жилийн хугацаанд өр зээлтэй холбоотой ямар ч нөхцөл байдал үүсээгүй гэдгийг албан ёсоор дэлгэрэнгүй тайлбар мэдээллийг хүргэсэн. Өнөөдрийг хүртэл 2012 оноос хойш нийт долоон бонд гаргасан байдаг.

Хамгийн эхэнд 2012 оны арванхоёрдугаар сард Чингис бонд 1.5 тэрбум доллар, 2015 оны зургадугаар сард Дим сан бонд гарсан. 2016 оны дөрөвдүгээр сард Мазаалай бонд гарсан. Өөрөөр хэлбэл, 2012-2016 онд энэ гурван бонд нийтдээ 2.2 тэрбум бонд гарсан. Үүнээс хойш 2016-2021 оны хооронд Хуралдай, Гэрэгэ, Намад, Century гэсэн дөрвөн төрлийн бонд гарсан. Нийт гарсан 5.2 тэрбум долларын долоон бондын зөвхөн хамгийн анхны Чингис бонд л төсөл, арга хэмжээнүүдийг санхүүжүүлсэн байдаг.

Харин Дим сан, Мазаалай хоёр бол төсвийн алдагдлыг нөхөхөд зарцуулсан. Дараа нь гарсан гурван тэрбум долларын дөрвөн бонд нь дандаа өмнөх өрүүдээ төлсөн зээлийн зохицуулалтын зориулалттай гарсан байдаг. Эдгээр бондууд аль Засгийн газрын үед өрөө тавьсан байна, алинд нь өрөө төлж явсан гэдэг нь тодорхой харагдаж байна. Ардчилсан нам Засгийн эрхийг барьж байх үед төсөл, арга хэмжээг санхүүжүүлсэн, алдагдлыг нөхсөн бондууд гарсан байдаг. МАН Засаг барьж байх үед гарсан дөрвөн бонд нь өрийг өрөөр төллөө гээд шүүмжлээд байдаг бүх өмнөх өрөө төлсөн байдаг. Учир нь, өмнө нь өр үүсгээд орж ирсэн эдийн засгийн үр өгөөж өнөөдрийг хүртэл байхгүй. Өрийг тавьсан улс одоо дефолт болох гэж байна гээд алга ташаад гүйгээд байдаг. Харин өрийг нь төлж байгаа өнөөдрийн Засгийн газар өрийн хүндийг үүрч байна" гэв.

Б.ЖАВХЛАН: Одоогийн Засгийн газар өрийн хүндийг үүрч байна

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.eccold.top хариуцлага хүлээхгүй.