НАМ ДАРСАН НӨХӨН СОНГУУЛИАС ХҮЛЭЭХ ҮР ДҮН ДААНЧ АЛГА

Б. Бадралмаа:
Улс төр- Тоймчийн үг

2021-09-28, 718

2020 оны УИХ-ын ээлжит сонгуулиар бүрдсэн парламентад хоёр суудал эзгүйрч, Ерөнхийлөгч, хотын дарга нарын суудлыг хэн нөхөх вэ гэдэг өрсөлдөөн хоёр тойрогт өрнөж байна. Хэнтий аймаг, Сонгинохайрхан дүүрэгт гол өрсөлдөөн явах ч өнөөгийн улс төрийн өнгийг хэн тодорхойлох вэ, ард түмнийг төлөөлж, хууль батлах гишүүн хэн байх вэ зэрэг нь нөхөн сонгуулиас тодорхой болно. Тиймээс нөхөн сонгууль явж буй хоёр тойргийг иргэдээс гадна улс төрийн нөхцөл байдлаас шалтгаалж иргэдийн анхааралд байх чухал асуудлын нэг. Гэвч энэ удаагийн нөхөн сонгууль олны анхаарлаас холуур, нам гүмхэн болж өнгөрөх нь.

Эрх баригч намынханд ч нөхөн сонгуулийг олны хэл амнаас холуур чимээгүй явуулах сонирхол их бий. Хэдийгээр энэ удаагийн сонгуульд 14 хүн өрсөлдөхөөр сонгуулийн сурталчилгааны ажлаа хийж байгаа ч гол тоглогч болж олны хараанд өртөх нэр дэвшигч ховор байгаа. Энэ нь ч эрх баригч намынханд аз болж, нөхөн сонгуулийн нам жим явуулах таатай нөхцөл болж байгаа билээ. МАН Сонгинохайрхан дүүргийн нөхөн сонгуульд Э.Батшугарыг нэр дэвшүүлж, азаа үзэж байгаа. Хэдий тэнд нөхөн сонгуулиар нэр дэвшүүлэх залуу боловсон хүчин хангалттай байсан ч төр толгойлох их үйлсэд хувь нэмэр оруулсан МАХН-ын даргын хүслийг биелүүлж, ганц хүүг нь дэмжихээс өөр аргагүй байдалд хүрсэн гээд хэлчихэд хол зөрөхгүй. Өөрөөр хэлбэл, МАН-ын генсек, Ерөнхийлөгч нар өрөө цайруулж, амлалтаа биелүүлэхээс өөр гарцгүй болж, нүдээ аниад Э.Батшугарыг нөхөн сонгуульд намаасаа нэр дэвшүүлж орхисон. Иймдээ ч тэд Сонгинохайрхан дүүргийн нөхөн сонгуульд төдийлөн ач холбогдол өгөхгүй, нам гүмхэн байлгахаар арга тактик боловсруулж байгаа нь ажиглагдлаа.

Ингэхдээ тэд нийгэмд сенсац тарих янз бүрийн сэдэв гаргаж, нөхөн сонгуулиас иргэдийн анхаарлыг холдуулж байгаа харагдана.

Нөхөн сонгуулийн сурталчилгаа эхлэхтэй зэрэгцээд шатахууны хомстол үүсэж, нийгэм даяараа хэд хоног шуугьцгаав. Иргэдийн гол хэрэгцээ болсон АИ-92 шатахууны нөөц гэнэтхэн л тасалдаж, шатахуун түгээх станцууд ачааллаа дийлэхгүй, автомашины дараалалд дарагдсан. Шатахуун импортлогч ОХУ хэдэн сарын өмнө үйлдвэрийн засварын ажил эхэлж байгааг анхааруулж, шатахуунаа нөөцлөхийг холбогдох хүмүүст мэдээлж байсан ч манайх нүдэн балай чихэн дүлий, таг чиг орхичихсон гэх. Цаг хугацааны давхцалыг харахад энэ асуудал зүгээр ч нэг санамсаргүй гараад ирчихсэн биш бололтой.

Намаасаа нөхөн сонгуульд сойсон Э.Батшугарыг олны анхаарлаас холуур өнгөрөөх гэсэн эрх баригч намынхны шинэ арга тактик ч байж мэдэх юм. Харин Хэнтий аймагт өрнөж буй нөхөн сонгуульд тойргийн иргэд л анхаарч олны нүднээс далдуур тэгсхийгээд өнгөрөх нь тодорхой болов бололтой. МАН-аас аймгийн Засаг даргыг нь сонгуульд сойж, сонгууль болохоос өмнө тойргийг нь нэлээд сайн усалсан гэх цуу яриа бий. Ямартай ч тэд санасандаа хүрч, иргэдийн анхаарлыг нөхөн сонгуулиас холуур тойруулж чадлаа.

Харин сөрөг хүчний үүрэг гүйцэтгэж байгаа Ардчилсан намынхан Их хуралд дахиад хоёр суудал авах гэж хэрэндээ хичээж байна. Ямар сайндаа л нам гүмхэн сонгуулийг олны анхааралд авч ирэх гэж Улсын баатар Э.Бат-Үүл Баатар цолноосоо татгалзаж, тэмдгээ тугандаа зүүх билээ. Тэд өмнөх Ерөнхийлөгчийн сонгуулиар талцаж, маргалдаж, хоорондоо өрсөлдсөөр олны доог тохуу болж, хоёрдогч хүчнийхээ байр суурийг алдчихсан гашуун түүхтэй. Иймдээ ч энэ удаагийн сонгуульд нэлээд ач холбогдож өгч, намаа нэгтгэж, эв нэгдэлтэй оролцоно гэдгээ зарласан.

Сүүлд намын даргаар сонгогдсон залуу дарга нар хамтарч мэдэгдэл хийж, намын хуучин лидерүүдээ дэмжихийг уриалаад байгаа. Хачир дээрээ Ардчилсан нам нэгдсэн гэж мянган удаа мэдэгдэл хийвч намаа хоёр хуваасан гэх гол тоглогч нар өнөөдрийг хүртэл сураг чимээгүй байгаа нь анхаарал татаж буй. Тодруулбал, намын дарга асан С.Эрдэнэ өнөөдрийг хүртэл намын нэгдлийн талаар ам нээгээгүй. Нэг ёсондоо Ардчилсан намын нэгдэл нөхөн сонгуулийн шоу байж мэдэх юм.

Их хуралд гуравдагч хүчний үүрэг гүйцэтгэж буй Хөдөлмөрийн үндэсний намынхан Сонгинохайрхан дүүрэгт төлөөлөгчөө илгээж, намынхаа бүх хүчийг Б.Найдалаа руу чиглүүлж байгаа. Гэвч тэдэнд найдлага тун бага байх шиг. Ямар сайндаа л олны хараанд өртөх гэж шатахуун тасалдах сургаар морьтой сурталчилгаа эхлүүлэх билээ. Тэд өөрсдийгөө шинэ залуу боловсон хүчин хэмээн тодорхойлдог ч энэ удаагийн сонгуулийн сурталчилгаа нь “бай”-гаа оносонгүй. Шатахууны хомстолд орж, шатахуун түгээх станцуудад иргэд хонон өнжин дугаарлаж байхад морь унаж, иргэдээ тохуурах сан нь оновчтой санаа биш байлаа.

Нөхөн сонгуульд нэр дэвшсэн 14 нэр дэвшигчийн хооронд гал гарсан өрсөлдөөн өрнөн нь гэж хүлээлтгүй болов. Эндээс харахад Ерөнхийлөгч, хотын дарга нарыг орлох нөхөн сонгуулиас хүлээх үр дүн даанч алга даа.

НАМ ДАРСАН НӨХӨН СОНГУУЛИАС ХҮЛЭЭХ ҮР ДҮН ДААНЧ АЛГА

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.eccold.top хариуцлага хүлээхгүй.

Нийт сэтгэгдэл: 1

Сэтгэгдэл үлдээсэн: 2021-09-28 10:03:52

Буурай: Хүн тоодоггүй, өөрийгөө голдоггүй, өрсөлдөөд гардаггүй, ярихаас цаашгүй, шантаажлахаас өөргүй, өөрийгөө өндөг шиг бодсон, хоорондоо хахиралдсан, төрд хэрэггүй, түмэнд хүндгүй, түнтгэр, тонтгор, өндөр нам, бүдүүн, туранхай хэсэг хүмүүс байнаа ...үзсээр яваад л өндөр насны тэтгэвэртээ суух байхдаа хөөрхийс..

Шинэ мэдээ