Бид энэ удаагийн “Монголын гэрэлт ирээдүй” буландаа шатаж байсан гэрээс дөрвөн настай хүүхдийн амийг аварсан Хөвсгөл аймгийн Тариалан сумын Ерөнхий боловсролын сургуулийн 9В ангийн сурагч Б.Буянбаярыг урьж, ярилцлаа.

          Тухайн үйл явдал нь 2022 оны аравдугаар сарын 25-ны өдөр болж, 13, 14 настай хоёр хүү баатарлаг үйлс бүтээж байсан билээ.

-Сайн уу. Өнгөрсөн жил амийг нь аварсан дүүтэйгээ одоо холбоотой байдаг уу?

           -Тухайн үед гуравдугаар зэргийн түлэгдэлтэй, угаартсан байсан дүү маань одоо инээгээд л цэцэрлэгтээ явж байгаа. Ирэх жил сургуульд орно. Тэр дүүгээ харахаар өөрсдөөрөө бахархах сэтгэл төрдөг.

-Тухайн үед яг юу болсон юм бэ?

              -Тэр өдөр найзтайгаа хамт гэрийнхээ усыг зөөгөөд явж байсан юм. Тэгтэл манай урд талын айлаас юм дэлбэрэх чимээ гараад, тооноор нь утаа саагиж байсан. Бас дотор нь хүүхэд уйлах чимээ гарснаа чимээгүй болчихсон.

        Найз бид  хоёр сандраад хаалгыг таттал, цоожтой байсан учир түлээгээр эвдэх гэсэн ч болоогүй.  Тэгээд газраас чулуу аваад, цоожийг нь нүдэж өгсөн дөө.  Хаалга онгойж, хүүхдийг гаргахтай зэрэгцэн Онцгой байдлын аврагчид ирж галыг бүрэн унтраасан. 

Үнэндээ жаахан айж байсан.  Гэхдээ хүүхдийг “Аврах ёстой” гэх бодол биднийг зоригжуулсан  

-Та хоёрт өөрсдөө бэртчихвий гэсэн айдас байсан уу?

                -Үнэндээ жаахан айж байсан.  Гэхдээ хүүхдийг “Аврах ёстой” гэх бодол биднийг зоригжуулсан.

-Найзыг нь хэн гэдэг вэ, тухайн үед чамд юу гэж хэлсэн бэ?

                -Манай найзыг Б.Энхбаяр гэдэг, 14 настай. Тэр үед “Жаахан л айлаа, гэхдээ гоё байна аа” гэж байсан. Бид хоёрыг Хөвсгөл аймгийн дээд шагнал Хөвсгөлийн од медалиар шагнасан.

-Хүүхдийн аав, ээж та хоёр ямар нэгэн зүйл хэлж байв уу?

                -“Маш их баярлалаа. Миний дүү нар мундаг хүн болоорой” гэж байсан. Харин манай ээж, аав хоёр “Сайн байна, миний хүү” гэсэн.

-Ирээдүйн мэргэжлээ сонгосон уу?

                -Би техник талдаа илүү сонирхолтой болохоор инженер болно гэж бодож байгаа.

-Танай нутгаар өвөлжөө тавлаг байна уу? 

            -Тавлаг сайхан байна аа. Цас ихтэй, хүйтэн өвөл болох шинжтэй. Саяхан сургууль амраад орсон.

-Хүний амь аварч, баатарлаг гавьяа байгууласан чамаар найзууд нь бахархаж байна уу? 

        -Тийм ээ, миний найзууд надад урмын үг хайрлаж, магтсан. Тэр нь их сайхан байсан. 

-Ярилцсанд баярлалаа.