Бид энэ удаагийн “Гэрэлт ирээдүй” буландаа “Сөүл” бүжгийн сургуулийн монгол бүжгийн ангийн бяцхан бүжигчдийг онцолж, сурвалжилга бэлтгэлээ.

Б.СУВД: БИ МУНДАГ БҮЖИГЧИН БОЛОХЫГ МӨРӨӨДДӨГ

      Биднийг бүжгийн дугуйланд очиход бяцхан бүжигчид  багшийнхаа заасан хөдөлгөөн  бүрийг өөрийн хэмжээнд хамгийн сайнаараа дуурайн хийж харагдана.  Хэдэн хөдөлгөөн хийгээд л “Багш аа, Би мундаг байна уу, чадаж байна уу” гэнэ.  Тэдний төлөөлөл болгож, Б.Сувдтай ярилцлаа.

-Сайн уу. Хэзээнээс бүжиглэж эхэлсэн бэ?

            -Намайг Б.Сувд гэдэг, би 10 настай. Би долоон настай байхдаа ээжтэйгээ хамт тоглолт үзээд, бүжиглэж байгаа эгч нарыг хараад бүжиглэж сурмаар санагдсан. Тэдний гарын хөдөлгөөн, биеийн илэрхийлэмж үнэхээр гоё харагдсан. Тэгээд ээждээ “Би бүжгийн дугуйланд явж, энэ эгч нар шиг болмоор байна” гэж хэлэхэд намайг дэмжээд, зөвшөөрсөн.

-Бүжгийн урлагаар хичээллээд ямар өөрчлөлт гарсан бэ?

            -Миний нуруу нэлээд бөгтөр болоод байсан, бүжиглэж эхэлснээс хойш засраад гоё болсон. Бүжиглэхийн тулд сунгалт сайн хийх хэрэгтэй байдаг. Сунгалт хийснээр би илүү тэвчээртэй болсон гэж бодож байгаа. Бас сургуулийнхаа урлагийн наадамд бүжиглэж, илүү өөртөө итгэлтэй болсон.

-Найзууд болон багш нарынхаа талаар яриач?

            -Анх багш минь надад таалагдсан учраас энэ сургалтад явж эхэлсэн.  Багш маань хөдөлгөөнийг ойлгомжтойгоор яг бидний найз шиг байдаг. Бас сайн найзтайгаа хамт явдаг учраас илүү гоё байдаг. Зуны улиралд гэр бүлийнхэнтэйгээ зугаалж, амарсан болохоор найзуудыгаа болон багшийгаа маш их санаж байна.

-Ирээдүйд бүжигчин болох уу?

            -Би мундаг бүжигчин болохыг мөрөөддөг. Мөрөөдлөө биелүүлэхийн төлөө хичээж байгаа. Бүжиг олон төрөлтэй ч надад үндэсний бүжиг илүү таалагддаг.  

            Хөгжмийн аяа мэдэрч, жижигхэн гар, хөлөө туялзууланхан чин сэтгэлээсээ бүжиглэх тэд дэндүү өхөөрдөм харагдана. Мөн сунгалтын дасгал хийхэд нь нүдэнд нь нулимс цийлгэнэсэн ч хийж, дуусгаж байхыг нь харах дэндүү бахармаар... Тэдний хамгийн бага нь таван настай. Тэд эгч нар болон багшийнхаа бүжиглэж байхыг дуурайсаар байгаад, хялбархан бүжиглэж сурдаг гэнэ. 

БАГШ А.МӨНГӨНЧИМЭГ: БҮЖГЭЭ МЭДЭРЧ, СЭТГЭЛЭЭСЭЭ БҮЖИГЛЭЖ БАЙГАА НЬ БАХАРХМААР БАЙДАГ

            -Нэг өдөр нь заавал  балетын дасгал орно. Бүх бүжгийн суурь балет байдаг. Тэгээд үндсэн монгол бүжгийн элементүүдээ зааж эхэлдэг.  Мөн бага наснаасаа эхлэн үндэсний бүжгээрээ хичээллэснээр монгол угсаатнуудын онцлог өөр хоорондын ялгааг тухайн бүжгийн хөдөлгөөн, хувцаслалт, характар, юуг илүүтэй онцлон илэрхийлэхийг зорьж байгаа зэргээс нь таньж мэдэх боломжтой юм. Монгол бүжгийн дэглэлтүүдийг монголын ахуй соёлоос санаа авч гаргасан байдаг тул хүүхдүүд бүжгээр дамжуулан өв соёлоо танин мэдэх давуу талтай.Үүний нэг жишээг дурдвал. Цаатан ястны урцанд амьдардаг ахуйн зан үйлийн хэсгийг хөдөлгөөнөөрөө илэрхийлэн харуулдаг ба цаатан бүжгийн гол хөдөлгөөнүүд нь гараараа бугын эврийг төлөөлүүлж, хөлийн хөдөлгөөнөөр бугын цамнааг илүүтэй дүрслэн харуулсан байдаг.

Б.УУГАНЦАЦРАЛ: ОХИН МААНЬ БҮЖГИЙН ДУГУЙЛАНД ЯВААД БИЕ НЬ ӨВ ТЭГШ БОЛЖ, ӨӨРИЙГӨӨ ИЛЭРХИЙЛЭХ ЧАДВАР НЬ САЙЖИРСАН

         Охин маань бүжгийн дугуйланд яваад нуруу, хөл нь засарч, бие нь өв тэгш болж хөгжиж байгаа. Хүмүүс “Энэ хөөрхөн охин гоё бүжиглэх юм аа” гэхээр өөрийн эрхгүй охиноороо бахархаад сайхан байдаг.  Бид хоёр бүжгийн тоглолт хамтдаа үзэх дуртай. Хүмүүс тоглолт үзээд нойрмоглодог бол бид хоёр хөдөлгөөн бүрийг нь ажиглаж үздэг. Тэгээд гэртээ хариад дагаж хийж үздэг дээ. Бүжгийн дугуйланд явсан цагаасаа эхлээд, чөлөөт цагаараа юм л бол хөдөлгөөнөө давтдаг болсон. Дээрээс нь бие даах чадвар нь сайжирсан. Одоо хичээл нь жоохон жигдрээд ирэхээр сургалтад нь үргэлжлүүлж явуулна.  Цаашдаа болж өгвөл бүжгээр нь тууштай явуулна. Хөгжим бүжгийн коллежид суралцуулах гээд бэлдэж байгаа. Ер нь хүүхдийг багаас нь урлагаар хичээллүүлэх нь олон сайн талтай юм билээ.

  Биднийг ийн ярилцах зуур сургалтын цаг дуусаж, бяцхан бүжигчид хувцсаа сольж, “Баяртай багш аа” гээд эцэг, эхчүүдтэйгээ хамт бүжгийн заалнаас гарцгаалаа.