Ой тогтоолын улсын аварга шалгаруулах тэмцээнээс гурван хүрэл, гурван мөнгөн медаль хүртсэн Т.Тунгалагжаргалтай ярилцлаа. Тэрбээр Хэнтий аймгийн Бор-Өндөр сумын Монголын оюун ухааны академийн тамирчин бөгөөд  Ази номхон далайн бүсийн аварга шалгаруулах тэмцээнд эх орноо төлөөлөн оролцох тамирчдын нэг билээ.

-Ой тогтоолтын улсын аварга шалгаруулах тэмцээнээс зургаан медаль хүртсэнд баяр хүргэе.  Манай уншигчдад өөрийгөө танилцуулахгүй юу?

          -Баярлалаа, намайг Түвшинзаяагийн Тунгалагжаргал гэдэг. Би 11 настай, Хэнтий аймгийн Бор-Өндөр сумын Бор-Өндөр Цогцолбор сургуулийн 7в ангид сурдаг.

-Улсын аварга шалгаруулах тэмцээнээс зургаан медаль хүртсэн сэтгэгдлээсээ хуваалцахгүй юу?

         -“Оюуны наадам 2023” наадмын Ой тогтоолтын улсын аварга шалгаруулах 13 дахь удаагийн тэмцээнд оролцож гурван мөнгө, гурван хүрэл медаль авсандаа маш их баяртай байна. Өнгөрсөн жил оролцоод алтан медаль хүртэж байсан.

-Тун удахгүй Азийн аварга шалгаруулах тэмцээнд оролцох гэж байна шүү дээ. Өөртөө ямар зорилго тавьсан байна?

          -Ой тогтоолын Азийн аварга шалгаруулах нэр хүндтэй тэмцээнд эх орноо төлөөлөн оролцох болсондоо маш их баярлаж, догдолж байна. Шигшээ багийн ах эгч, найз нартайгаа хамт тэмцээнд оролцох бэлтгэлээ хийсэн. Азийн наадамд амжилттай оролцож азийн мастер цолны болзлыг хангах зорилго тавьсан байгаа. Зорилгодоо хүрэхийг хичээж байгаа.

-Анх яагаад ой тогтоолтын спортоор хичээллэхээр болов. Юу чамд нөлөөлсөн бэ?

             -Анх 2021 оны арванхоёрдугаар сард манай суманд Ө.Сэнгэсамдан багш маань ой тогтоолтын сургалт явуулах болсныг мэдээд сургалтад бүртгүүлж байсан юм. Ой тогтоолтын спортоор хичээллэдэг, үлгэр дуурайлал авдаг их мастер ах эгч нар шигээ болохыг хүссэн.

-Оюуны спортоор хичээллэж эхлээд  хэцүү зүйлтэй  тулгарч байсан уу?

            -Анх оюуны спортоор хичээллэж эхлээд алдаа гаргах, хийж чадахгүй байх, багшдаа загнуулахад халширмаар үе зөндөө байсан. Гэхдээ өөртөө тавьсан зорилго байсан учраас ч шантралгүй хичээллэж ирсэн. Олон зүйл зааж сургасан багшдаа их баярлаж явдаг.

-Тус спортоор хичээллэснээр чамд ямар өөрчлөлтүүд гарсан бэ?

           -Оюуны спортоор хичээллэснээр сонирхол нэгтэй  олон найзууд, ах эгч нартай болж, өөрийгөө чөлөөтэй илэрхийлдэг болсон. Мөн аливаа зүйлд цэгцтэй ханддаг болж, ой тогтоолт маш сайжирсан. Ер нь надад олон эерэг өөрчлөлт авчирсан.

-Ой тогтоолтоор хичээллэхийн юу нь хамгийн сайхан, гоё санагддаг вэ?

           -Энэ спортоор хичээллэснээр гарах олон эерэг өөрчлөлт бүр сайхан санагддаг. Тэр дундаас мундаг ах эгч нартай хамт шигшээ багийн бүрэлдэхүүнд орж, эх орноо төлөөлж олон улсын тэмцээнд оролцож байгаа нь хамгийн сайхан санагдаж байгаа.

-Чамд хийх дуртай ой тогтоолтын дасгал бий юу. Найзууддаа дасгал зааж өгдөг үү?

            -Баганан үгсийн дасгалыг хийх хамгийн дуртай.  Учир нь,  баганан үгсийг хөгжилтэй аргаар цээжилдэг болохоор сонирхолтой  байдаг. Дүүдээ зааж өгч хамт цээжилж тоглох гоё байдаг. Хөзөр хурдан цээжлэх дасгалыг хэрхэн хийдэг талаар хүүхдүүд, найзууд маань  их асуудаг.

-Өдөрт хэчнээн цаг  бэлтгэл хийдэг вэ. Бэлтгэл хийхэд юу хамгийн чухал байдаг вэ?

           -Энгийн үед өдөрт 1-2 цаг бэлтгэл хийдэг. Харин тэмцээнд оролцох тохиолдолд өдөрт 7-8 цагийн бэлтгэл хийдэг. Бэлтгэл хийхэд тэвчээр, тууштай байдал хамгийн чухал байдаг.

-Тэмцээнд оролцохдоо сэтгэл зүйгээ хэрхэн бэлддэг вэ. Юунд хамгийн их анхаардаг вэ?

                -Тэмцээнд оролцоход анхаарал төвлөрөлт хамгийн чухал байдаг. Ямар нэгэн алдаа гаргасан ч дараагийн шат, төрлүүдэд анхаарлаа сулруулахгүй байхыг илүү хийхийг хичээдэг. Сандрахгүй, анхаарал төвлөрөлтөө алдахгүй байх чухал юм билээ.

-Ирээдүйд ямар мэргэжилтэй болохыг хүсдэг вэ?

          -Өвөө минь намайг хуульч болгохыг хүсдэг байсан юм. Би ч тус мэргэжилд дуртай болохоор том болоод сайн хуульч болохыг хүсдэг.

-Цаашид ой тогтоолын спортоор үргэлжлүүлэн хичээллэх үү. Тавьсан зорилго бий юү?

            -Ой тогтоолтын спортоор тасралтгүй хичээллэнэ. Монгол Улсын аварга, Дэлхийн аварга болох хүсэж, зорьж байгаа.

-Ярилцлага өгсөнд баярлалаа. Дараагийн тэмцээнд нь амжилт хүсье.