Төв аймгийн Зэвсэгт хүчний 311 дүгээр ангид алба хааж байсан хугацаат цэргийн алба хаагч нас барсан хэрэг гарчээ. Тодруулбал, цагдаагийн байгууллагад хоёрдугаар сарын 27-нд “Цэргийн албан хаагч амиа хорлочихлоо” гэсэн дуудлага иржээ. Дуудлагын дагуу Төв аймгийн Алтанбулаг сумын цагдаа нар хэргийн газарт ажиллаж, шалгалтын ажиллагаа явуулж байгаа аж.

         Талийгаач байлдагч 22 настай байсан бөгөөд цагаан сарын өдрүүдэд чөлөөгөөр гарч, гэртээ хариад ирсэн байжээ. Талийгаач хоолойгоо боомилж, амиа алдсан гэх мэдээлэл байна. Мөн түүний уг үйлдлийг таслан зогсоох гэж оролдсон боловч хугацаа алджээ. Талийгаач эмнэлгийн байгууллагад хүргэгдэх замдаа амьсгал хураажээ.

      Энэ талаар Зэвсэгт хүчний 311 дүгээр ангийн захирагч, хурандаа Б.Буянжаргал “Манай ангид алба хааж байсан хугацаат цэргийн албан хаагч амиа алдсан нь үнэн. Цагдаа, шүүхийн байгууллага шалгалтын ажиллагаа явуулж байна. Хууль хяналтын байгууллагынхан шалгаж байгаа учраас мэдээлэл өгөх боломжгүй” гэжээ.

Ташрамд дурдахад, Зэвсэгт хүчний жанжин штабаас дотоод шалгалт явуулж байна.