Сангийн сайд Б.Жавхлан 2021 оны төсөвт тодотгол хийх эсэх талаар байр сууриа илэрхийллээ. Тэрбээр "2021 оны төсөвт тодотгол хийнэ гэж хэлэхэд эрт байна. Төсөвт тодотгол хийхийг хэдэн хүн шаардаад, Сангийн сайд, Засгийн газраас шийдвэр гаргачихдаг юм  биш. Төсвийн тухай хуулиараа нөхцөл нь тодорхой болсон байх ёстой. Одоогоор төсөвт тодотгол хийх шаардлага үүсээгүй байна. Сүүлийн хоёр сарын төсвийн орлого урьдчилсан байдлаар 100  хувь гарсан байна.

Эдийн засаг хөдөлгөөнд орохоор төсвийн орлого хэвийн болж байна. Төсвийн зардал тасалдаагүй, төсвийн хөрөнгө оруулалтад дээр одоогоор эрсдэл үүссэн зүйл байхгүй. Тиймээс өнгөрсөн жил баталсан төсвийн хүрээнд хэвийн явуулж болно. Зэсийн үнэ төсөвт төсөөлснөөс өндөр үнэтэй байгаа. Энэ тайвшрах шалтгаан биш. Тиймээс төсвийн сахилга батаа алдаж болохгүй. Улсын төсвийн хөрөнгө оруулалтууд 2020 оны төсвийн гүйцэтгэлээр тасарсан нь үнэн. 170-180 орчим тэрбум төгрөгийн гүйцэтгэл тасарсан. Үүнийг 2021, 2022 оны хөрөнгө оруулалт шингээх замаар зохицуулна" гэв.