Баянхонгор аймгийн Бууцагаан сумын харьяат малчин Ж нь арваннэгдүгээр сарын 27-нд 21:00 цагийн сумын орчимд автомашинтай сумын төвөөс гараад сураггүй болсон байна. 

      Улмаар тус сумын онцгой байдлын алба эрэн хайх ажиллагааг шуурхай зохион байгуулж, арваннэгдүгээр 28-ны өдрийн 23:34 цагт бага зэргийн осголттой байхад нь олж,  эрүүл мэндийн байгууллагад хүлээлгэн өгчээ. Энэ талаар тус сумын Засаг дарга Д.Лхагвадоржоос тодрууллаа. "Иргэн Ж сумын төвд идэшний мах хүргэж өгөөд буцах замдаа төөрсөн гэсэн. Биднийг олоход автомашины шатахуун нь дуусаж, аккумлятор нь суусан байсан. Ингээд хүйтэнд даарч, осгосон байхад нь олсон. Одоо сумын нэгдсэн эмнэлэгт хэвтэн эмчлүүлж байна. Манай суманд өчигдөр эрс хүйтэн байлаа. Уг нь цас багатай. Гэхдээ цочир хүйтэрсэн учраас иргэд бэлтгэл муутай, малаа цасан шуурганд уруудуулах явдал гарсан. Малын хорогдол харьцангуй гайгүй байна" гэв.