Ямарч л байсан тэр өнөөдөр амьд байсан бол авлигачин, ард түмний боломжийг хулгайлагч, ямар нэг хонгилын эзэн гэж цоллуулахааргүй хүн байх байсан гэж ард түмэн чин голоосоо итгэдэг. Тиймдээ ч өдий 23 жил ард түмэн С.Зоригийн үхлийн буруутныг олох нэхэлтэй яваа биз. Эс бөгөөс загасны ой санамжтай гэгддэг манай нийгэмд 23 жил гэдэг хэтэрхий урт хугацаа. 

Байхгүй хүнийг байсан бол гэж дурсах ямар хэрэг байна гэхээр энэ хэргийн мөн чанар нь энд л байсан юм. “Хайран улстөрч”, “Ард түмний төлөө хоёргүй сэтгэлээр дүүлэх байсан хараацай” гэсэн харамсал, халаглал С.Зоригийн хэргийг 23 жил “амьтай” байлгасан гэх үү дээ. Үг үйлдэл, үзэл бодол бүхэн нь ард түмэнд таалагддаг, улсын хөгжлийг түчээлнэ гэж итгэдэг байсан учраас үхэлд нь нийтээрээ харамссан. Тиймдээ ч төдийгөөс өдий хүртэл С.Зоригийг хэргийг ярьсан хэн нэгэн улстөрч, нам эсвэл бүхэнд итгэж, илрүүлнэ гэж найдаж ирлээ. Ард түмний “Жинхэнэ хэрэгтэн нь хэн бол” гэх хүлээлтийг МАН, АН ялгаагүй хангалттай ашиглалаа. 

Одоогоос таван жилийн өмнө, С.Зоригийг амиа алдсанаас 18 жилийн дараа “Хэрэгтнүүдийг оллоо” гэж зарласан, гурван хүнд ял оноосон. Хэн хэн гэдгийг нь бүгд мэдэх учраас одоо нэрсийг нь дурсах ч илүүц болсон. Гэвч ингээд ч С.Зоригийн хэргийг дуусгаагүй. Хэрэг хийсэн хүмүүс нь байгаа юм бол захиалсан хүн нь байх ёстой гэсэн эрэлд ард түмнийг гаргасан. Түүнээс хойш таван жил өнгөрч байна. Чухамдаа МАН, АН ялгаагүй ард түмнээр “С.Зоригийн захиалагч нь хэн бэ” гэдэг таавар таалгасаар, ингээд 23 жил өнгөрлөө. 

Энэ Засгийн газар анхнаасаа ийм сонирхолтой байгуулагдсан гэмээр. Ам нээхдээ л С.Зоригийн хэрэг, Т.Чимгээ, Б.Содномдаржаа гэж уулга алддаг Ц.Нямдоржийгоо ч “Туршлагыг нь хүндлээд” хэмээн буцаагаад Засгийн газартаа оруулаад ирсэн. Хууль зүйн сайдын эрх мэдлээрээ С.Зоригийн хэрэгт “нэвтэрхий”, “мэргэшсэн” шахуу Ц.Нямдорж нь ч Засагт орж ирмэгцээ Л.Оюун-Эрдэнэ, Х.Нямбаатар хоёрт “багшилж”, 2019 онд Т.Чимгээ, Б.Содномдаржаа хоёрыг эрүүдэн шүүж буй гэх 27 минутын бичлэг цацсан туршлагаа заагаад өгчихсөн аятай л үл явдал хөвөрсөөр байна. Үүнийг нь батлах гэсэн шиг Ц.Нямдоржийн зааснаар Х.Нямбаатар, Л.Оюун-Эрдэнэ хоёр нь “Т.Чимгээг эрүүдэн шүүж буй бичлэг” нэртэй хоёр минут 52 секундын бичлэг цацчихаж байгаа маягтай. С.Зоригийн хэрэг хэзээ илрэх бол гэж битүүхэн хүлээдэг ард түмнийгээ хоёр жил тутам нэг бичлэгээр “хооллоод” сурчихлаа, МАН-ынхан. Ц.Нямдоржийг “С.Зоригийн хэргийг шалгах ажлын хэсгийн хамгийн олон удаа буюу дөрвөн удаа тарааж, тэр ажлын хэсэгт ажиллаж байсан 32 хүнийг ажлаас халсан. Ц.Нямдорж бол С.Зоригийн хэргийг гацаагч” гэж Тагнуулын дарга байсан Б.Хурц хэлж байсан. Үнэн бол засагт орж ирсэн Ц.Нямдорж “багачуудаараа” дамжуулаад С.Зоригийн хэргийг цаашид ч “гацаах” нь “тодорхой”.