ЖДҮХС-гаас УИХ-ын гишүүний эрх мэдлээ ашиглан их хэмжээний хөнгөлөлттэй зээл авсан Б. Ундармаа, Д.Дамба-Очир нарт холбогдох шүүх хурал болж байна. Тэгвэл тэд ял завшиж, торгуулаад өнгөрөх нь тодорхой болж буй бололтой.

Тодруулбал, УИХ-ын гишүүн асан Б.Ундармааг АТГ-аас 2018 оны арванхоёрдугаар сараас эхлэн шалгаж эхэлсэн бөгөөд тэрбээр өөрийн 100 хувь эзэмшдэг “Доктор МИЭК” компанидаа ЖДҮХС-гаас 700 сая төгрөгийн зээл авсан нь тогтоогдсон байдаг. Улмаар шүүхээс Эрүүгийн хуулийн ерөнхий ангийн 3.1 дүгээр зүйлийн 2, 3.4 дүгээр зүйлийн 1 дэх хэсэгт заасныг тус тус журамлан мөн хуулийн тусгай ангийн 22.1 дүгээр зүйлийн 3 дахь хэсэгт заасны дагуу 2,5 жилийн хорих ял төлөвлөөд байсан юм. Гэвч хорих ял эдлэхгүйгээр 40 сая төгрөгөөр торгуулаад  хэргээс мултрахаар болж буй бололтой.

УИХ-ын гишүүн асан Д.Дамба-Очирын хувьд ЖДҮХС-гаас өөрийн хамаарал бүхий “Сапфир стоун”ХХК-даа 1,2 тэрбум төгрөгийн зээл авсан хэрэгт холбогдсон. Түүний гэм буруугийн шүүх хурал өнгөрсөн наймдугаар сард болж, Баянзүрх дүүргийн эрүүгийн хэргийн анхан шатны шүүхээс түүнийг албан үүрэг, бүрэн эрх, албан тушаалын байдлаа урвуулан ашиглаж, өөртөө болон бусдад давуу байдал бий болгосон гэмт хэрэгт хатгагчаар хамтран оролцсон гэм буруутайд тооцож, Эрүүгийн хуулийн тусгай ангийн 22.1 дүгээр зүйлийн 3 дахь хэсэгт зааснаар нийтийн албанд томилогдох эрхийг зургаан жил хүртэлх хугацаагаар хасаж, 3 жил 6 сарын хугацаагаар хорих ял шийтгэж, уг ялыг нээлттэй хорих байгууллагад эдлүүлэхээр тогтоож шийдвэрлэсэн байдаг. Тэгвэл энэ ялыг мөн буцааж, торгох шийтгэл ногдуулахаар болсон тухай эх сурвалж мэдээллээ. 

ЖДҮХС-гаас албан тушаал эрх мэдлээ ашиглан их хэмжээний зээл авсан этгээдүүдийн хэрэг жил тойрон шүүхээр хэлэлцэгдэж буй. Жирийн иргэдийн боломжийг хулгайлсан тэднийг хуулийн дагуу шийтгэж, шударгаар хариуцлага тооцно гэсэн хүлээлт нийгэмд байсан. Гэвч тэрбум төгрөгийн хэргийнхээ хариуд 30 сая төгрөгөөр торгуулсан болоод өнгөрөх нь бололтой.