Уншигч та ОХУ-ын Тюмень мужийн Боровский тосгоны гал унтраагч муурны тухай сонссон уу. Ажлынхан нь Семен хэмээх нэр өгсөн уг муур Тюмень муж дахь Онцгой байдлын яамны харьяа Гал түймэр унтраах, аврах 135 дугаар ангид харьяалагддаг бөгөөд бүр үндсэн ажилтан нь юм. Нэр, алдар нь олонд түгэж, нийтэд нээлттэй болоогүй ч ажиллаж буй Тосгондоо хийсэн ажилтай, бүтээсэн гавьяатай Семен муурын тухай цөөн баримтыг уншигч танд хүргэе.

Семен өдгөө хоёр настай бөгөөд анх хэдхэн сартай нялх зулзага байхад нь Боровский тосгоны гал түймэр унтраагчид олжээ. Нялх зулзага байхаасаа л аврах ангийн машины дуут дохио, гал түймрээс гайдаггүй Семенийг ой хүрэхээс нь өмнө сургаж эхэлсэн гэнэ.

Семен муурыг ОХУ-ын Гал түймэр унтраах, аврах 135 дугаар ангийн үндсэн ажилтан болоход нь хэсгийн диспетчер түүнд тохирсон дүрэмт хувцас оёж өгчээ. Мөн тус аврах ангид Семенд зориулсан хувцасны шүүгээ хүртэл байдаг аж.

Семен муур ажлынхнаасаа хамгийн сайн цаг барьдаг нь. Өглөө ажлын цаг эхлэхэд ажил дээрээ өөрөө ирж, байраа эзлэн жагсаж зогсдог байна. Боровский тосгоны Гал түймэр унтраах, аврах 135 дугаар ангид ажиллаж эхэлсэн цагаасаа хойш ганц ч удаа ажлаасаа хоцорч, тасалж үзээгүй гэнэ.

Гал гарч, түймэр дэгдсэн газар Семен муур хамгийн түрүүнд хүрч, галын аюултай бүсэд хүн байгаа эсэх, галын төв нь хаана байгааг шалгаж, багийнхандаа мэдэгддэг.

Боровский тосгоны Гал түймэр унтраах, аврах 135 дугаар ангийн алба хаагчид Семен муурыг “Гал түймэр унтраах сахиус”-тай зүйрлэдэг гэнэ.

Мэдээж Семен ажлынхаа үр дүнд бусад гал унтраагчтай адилхан хэмжээний цалин, хөлс авдаг. Семен муурын цалингаар түүнд хоол, витамин авч өгч, мөн цалингийнх нь ихэнх хувийг гэрийн тэжээвэр амьтан асрах төвд хандивладаг аж.