Нагорный Карабахт Сирийн дайчид байлдаж байна гэв 

Цэргийн үйл ажиллагаа явуулдаг Туркийн компани Засгийн газрынхаа дэмжлэгтэйгээр Карабахт байлдах дайчдыг Сириэс сонгож шалгаруулж байна гэж Хүний эрхийн мониторингийн төв мэдэгдлээ. Өнгөрсөн сарын 30-ны байдлаар Азербайжаны армид 850 сири дайчин нээгдсэн бөгөөд тэд  зөрчлийн бүсэд явуулж буй цэргийн ажиллагаанд оролцож байгаа гэж тус төвийнхөн онцолжээ. Дайчдын олонх нь Сирийн туркменүүд буюу тус улсын умард хэсгээр оршин суудаг иргэд аж. Мөн Карабахын мөргөлдөөнд Сири, Ливийн зэвсэгт бүлэглэлүүдээс хөлсний дайчид байлдаж байгаа гэж ОХУ-ын дипломатчид үзэж буйгаа илэрхийлж байв.
 

Жо Байден нэг өдөрт 10 сая ам.долларын хандив цуглуулав 

АНУ-ын Ерөнхийлөгчийн сонгуульд Ардчилсан намаас нэр дэвшигч Жо Байден болон Бүгд найрамдах намаас нэр дэвшигч Дональд Трамптай хийсэн анхны мэтгэлцээнийхээ үеэр 10 сая орчим  ам.долларын хандив цуглуулж чаджээ. Нэр дэвшигчийн сонгуулийн штабаас мэдээлж буйгаар,  мэтгэлцээний өдрийн турш 215 мянган спонсор Жо Байденд хандив илгээсэн гэнэ. Ташрамд, өнгөрсөн наймдугаар сард тэрбээр 365 сая ам.долларын хандив цуглуулсан бол түүний өрсөлдөгч, Ерөнхийлөгч Дональд Трамп 154 сая ам.долларын хандив хүлээн авсан байна. 
 

А.Меркель С. Тихановская нар уулзана  

ХБНГУ-ын Канцлер Ангела Меркель Беларусийн Ерөнхийлөгчийн сонгуульд нэр дэвшигч асан, сөрөг хүчний төлөөлөл Светлана Тихановскаятай уулзахаар төлөвлөж буйгаа бундестагт үг хэлэхдээ онцолжээ. Канцлерын төлөөлөгчийн мэдэгдэж буйгаар уулзалт энэ сарын 5,6-ны үед Берлинд болох гэнэ. “Авлигаас ангид амьдралын төлөө гудамжинд гарч тэмцэж буй зоригтой бүсгүйчүүдийг бахдаж байна” гэж мэдэгдсэн  Канцлер сонгуульд ялалт байгуулж, тангаргаа өргөсөн Александр Лукашенког Төрийн хууль ёсны тэргүүн гэж хүлээн зөвшөөрөхгүй байгаа юм.