ОХУ-ын Элчин сайдын яамныхан Монголын махны холбооныхонтой уулзаж, их хэмжээний лаазалсан махан бүтээгдэхүүн, ноолуураа  хандивлахыг хүссэн. Ингэхдээ манай улсын барааны төлбөрийг багасгах тохироог хийж буй талаар эх сурвалжууд мэдээлээд байгаа. Энэ талаар олон улс судлаач П.Наранбаяраас тодрууллаа.

            Тэрбээр “Манай улс ОХУ руу махан бүтээгдэхүүн, ноолууран хувцас, эдлэлээ их хэмжээгээр экспортлох нь ашигтай. Мөн татвар бууруулна гэж байна, үеийн үед Монгол Улсад дэлхий зах зээлээс илүү хэмжээний барааны татварыг ОХУ-д төлж ирлээ шүү дээ.  Манай улсын гадаад бодлогод сонирхолтой үйл явдал өрнөж байна.  Франц Улсын Ерөнхийлөгч Эммануэль Макрон манай улсад  өнгөрсөн тавдугаар сард айлчилсан. Харин ердөө таван сарын дараа буюу аравдугаар сарын 10-ны өдөр Ерөнхийлөгч У.Хүрэлсүх Франц Улсад айлчлал хийж, уран олборлох асуудал дээр хамтран ажиллах талаар ярилцлаа. Үүнийг дагаад хоёр улсын харилцаа сайжирч томоохон гэрээнүүд хийгдэх байх. Мөн Ерөнхийлөгч У.Хүрэлсүх  уг айлчлалаас ирээд, хоёр хоногийн дараа БНХАУ-д айлчлахаар мордсон.  “Бүс ба зам” санаачилгын 10 жилийн ойг тохиолдуулан тус олон улсын хамтын ажиллагааны гурав дахь дээд хэмжээний уулзалтыг БНХАУ-ын талаас зохион байгуулж байна. Манай улсын хоёр хөрш орны удирдагч нартай гурвалсан уулзалт хийх нь эрсдэлтэй. Харин нэг нэгээр нь тулж, уулзах нь хамгийн зөв шийдвэр байх болно” гэлээ.