УОК, Засгийн газрын шийдвэрээр хөл хорио тавигдаад найм хонож байна. Засгийн газар, УОК, НОК-оос цаашид дахин хөл хорио тогтоохгүй, эдийн засгаа сэргээх, амьдралын хэвийн горимд шилжих чиглэл барьж ажиллахаа мэдэгдсэн. Тиймээс ч зах худалдааны төв, кинотеатр, паб, караоке гэхчилэн нийслэлийн нийт аж ахуйн нэгжүүдийн 90 хүртэл хувь нь үйл ажиллагаагаа эхлүүлж, амьдралын хэвийн горимд шилжээд байна. Түүнчлэн энэ сарын 1-нээс хот хоорондын зорчих хөдөлгөөнийг нээсэн билээ. Нийслэлээс гарах, орох хөдөлгөөн нээгдэж, аж ахуйн нэгжүүд үйл ажиллагаа явуулж эхэлсэнтэй холбоотойгоор тээврийн хэрэгслийн зорчих хөдөлгөөний ачаалал сүүлийн өдрүүдэд эрс нэмэгдээд байна. Товчхондоо, иргэд халдвар хамгааллын дэглэмээ баримтлан хэвийн амьдралдаа шилжсэнээр Улаанбаатар хотын алдарт түгжрэл эхэллээ. Тоон утгаар авч үзвэл нийслэлийн тээврийн хэрэгслийн зорчих хөдөлгөөн хөл хориотой байх үеийнхээс гурав дахин өссөн байна. Иймд бодит байдал ямар байгааг гэрэл зурагт буулгалаа.