Эртнээс өвлөгдөн ирсэн өв соёл, уламжлалд түшиглэн малчин ард түмэн үнээний цэвэр сүүгээр сүү, сүүн бүтээгдэхүүн хийж, өдөр тутамдаа хэрэглэсээр ирсэн билээ. Мөн тэрхүү сүүн бүтээгдэхүүн малчны гар дээрээс төв, суурин газрын хүнсний зах, худалдааны төвүүдэд “хүрч”, иргэдийн гарт очдог. Тэгвэл  европ стандартын гоуда бяслагийг “Лигийн ухаа” компани үнээний цэвэр сүүгээр үйлдвэрлэж, малчны хотноос нийслэлчүүд, монголчууд төдийгүй дэлхийн зах зээлд борлуулаад 20 жил болжээ. Өдөрт 2.4 тонн бяслаг үйлдвэрлэх хүчин чадалтай энэхүү компани дөрвөн төрлийн бяслаг үйлдвэрлэн зах зээлд нийлүүлдэг юм байна. Бид Төв аймгийн Алтанбулаг сумын нутагт байрлах “Лигийн ухаа” компанийн мэргэжилтнүүд “Хустай гоуда” хатуу бяслагийг хэрхэн үйлдвэрлэж байгааг та бүхэнд хүргэе.