Г.Аюурзанын зохиол, С.Бямба найруулагчийн бүтээл “Хэвтрийн хүн” кино өнгөрсөн сард нээлтээ хийгээд буй. Зохиолч, найруулагч хоёрын хоорондоо өрнүүлсэн ярилцлага цахим ертөнцөд  видео хэлбэрээр цацагдсан билээ. Уг ярилцлагаас зохиолч Г.Аюурзанын “Хэвтрийн хүн” зохиол, киноны талаар хэлсэн онцлох яриаг эшлэж байна.

• Би “Хэвтрийн хүн” зохиолыг ямар ч төлөвлөгөөгүй эхлүүлсэн. Төлөвлөгөөгүй гэдэг нь бас төлөвлөгөө юм даа. Юу ч бодохгүй, толгойдоо орж ирсэн юмаа шууд бичье гээд эхэлсэн. Туршилт маягийн эхний ажил маань “Хэвтрийн хүн” байсан. Тиймээс л зарим хэсэг нь түг таг гэчихсэн юм шиг, логик муутай ч юм шиг, сюрреалист ч юм шиг сонин юм болох нь дээ гэсэн чинь өдөр тутмын энгийн амьдрал шиг болоод явчихсан. Энэ ямар ч төлөвлөгөө, ингэж хийе гэсэн санаа байгаагүйгээс болсон. Гэхдээ ингэж бичихийн сайн тал нь зохиолоосоо амархан салдаг юм билээ. Уншихад хоёр цаг орох уу мэдэхгүй байна. Бичихэд лав хорин цаг ороогүй. Түүнээс хойш нас ч явсан. Яг тийм маягаар би ахиж бичээгүй.
• Би залуу байсан шигээ юу ч хамаагүй бичнэ. Тэр нь миний өмнө гаргасан хоёр романтай уялдаатай болохоор юу ч байхгүй харанхуй нөхөр биш, нэг ийм нөхөр байна даа гээд бодчихсон байгаа.

• Залууст хэлэхэд хорио, цээртэй ийм үед ч юм уу, ийм зохиол бичнэ гээд өглөөнөөс орой хүртэл суугаад үз. Болохгүй бол ураад л хаяна биз. Тэр үедээ би “Хэвтрийн хүн”-ийг гоё боллоо гэж бодоо ч үгүй. Хамгийн гол нь миний бичих дадалд их хэрэг болсон.

• Би “Хэвтрийн хүн” зохиолын юу нь кино болмоор санагдсан юм бол доо гэж бодсон болохоор зохиолоо зориуд ахиж уншаагүй.

• Киногоо үзээд “Эхийг нь уншихгүй яваад байсан нь зөвдөж дээ” гэж бодсон. Маш олон зүйлийг мартсан байна лээ. Маш олон зүйл сэргэсэн. Зарим өгүүлбэр нь надад хэн нэгэн буцаагаад хэлэх шиг санагдсан. Тухайн үед хүний сэтгэл татахаар нэг юм байж дээ гэж мэдэрсэн. Энэ л надад хангалттай. Ахиж уншихдаа бал аваад энд тэнд нь зурж магадгүй болохоор ахиж уншъя гэж бодохгүй байна.
• Би зохиолоо онгод гэдэг зүйлээр бичсэн гэж хэлэхгүй. Гэхдээ зохиол өөрөө цаг, эв нөхцөлтэй таараад л бүтдэг шиг байна. Тэгэхээр одоо шүүж цэгнэх гээд хэрэггүй юм шиг. Би үүнийг бичих хэрэгцээ байж. Тэр нь л гарсан юм байлгүй дээ гэж бодож байна.