А.ЦЭНДДУЛАМ: Би цаг нь болохоор Action эмэгтэй жүжигчнээр ажиллана гэж боддог

Д. Бямбасүрэн:
Гэрэлт ирээдүй- Шинэ танил

2022-03-03, 2935

Мориноос унах, шатнаас өнхрөх, гүүрэн дээрээс ус руу үсрэх, машинд мөргүүлэх, хаднаас унах зэрэг киноны хүнд хэсгүүдийг үүрч, дүүрч гардаг хүмүүс бол орлон тоглогчид. Орлон тоглогчгүйгээр баргийн уран бүтээл урагшлахгүй. Ялангуяа, түүхэн, зодоонтой киноны гол тулгуур нь орлон тоглогч гэдэгтэй хэн ч маргахгүй болов уу. Ийн өгүүлэхийн учир бид ээлжит ярилцлагынхаа зочноор залуу жүжигчин, орлон тоглогч А.Цэнддуламыг урилаа. Үргэлж эрсдэлийн өмнө зогсдог, зоригт, дайчин байхыг шаарддаг энэ төрлийн юу нь чухам түүнийг татсан талаар ярилцсанаа хүргэж байна.

-Сайн байна уу, манай уншигчдад өөрийгөө танилцуулаад, яриагаа эхлэх үү?

-Сайн, сайн байна уу. Намайг Атарсайханы Цэнддулам гэдэг. Би 2019 онд Кино Урлагийн дээд сургуулийг МУГЖ Г.Урнаа багшийн удирдлаган дор жүжигчин мэргэжилээр суралцаж төгссөн. Сургуулиа төгссөн жилийнхээ зунаас эхлэн “Mongol Stunt” НҮТББ-т орлон тоглогчоор ажиллаж байна.

-Жүжигчин мэргэжлээр төгссөн мөртлөө яагаад орлон тоглогчоор ажиллах болсон юм бэ?

-Би бага байхаасаа л жүжигчин болно гэж мөрөөддөг хүүхэд байлаа. Тэгээд л Жэки Чан-ы киног DVD гээр байнга үзнэ. Тэгээд би тулаантай киноны жүжигчин болно гэж шийдээд, “Тулаан сурмаар байна “ гэж ааваасаа гуйж байлаа. Тухайн үед аав, ах нар маань ярилцаж байгаад намайг таеквондогоор хичээллүүлэх шийдвэр гаргаж, анх ITF ийн “Чоно “ таеквондогийн клубт явж байгаад, жүжигчин мэргэжлээр суралцаж эхэлсэн. Жүжигчин мэргэжлээр суралцаж байхдаа нөгөө л тулаантай киноны жүжигчин гэдэг мөрөөдөлдөө хөтлөгдөн дахиад л илүү их зүйл сурмаар санагдаж, зуны амралтаараа морин циркийг зорьсон. Орлон тоглогийн багийг харин оюутан байхаасаа сонирхон, шохоорхож, биширч, битүүхэндээ орлон тоглогч болох хүсэлд автаж явлаа. Ингэж явсар сургуулиа төгсөж, “Single ladies4” киноны гол дүрийн жүжигчидийн орлон тоглогч хийх морь унадаг охин шалгаж авна гээд орлон тоглогчийн багаас залгаад дуудсан юм. Тэгээд л шалгуулаад тэнцэж байсан. Тухайн үед кино зураг нь эхлэх дөхсөн байсан болохоор шууд л ажилдаа ороод, хөдөө явж байсан. Хүсдэг мэргэжлээрээ, хүндэлдэг хүмүүстэйгээ хамт ажиллахаар явсан минь их сайхан санагдаж байсан.

-Орлон тоглогч нь жүжигчнээс юугаараа онцлог бэ?

-Жүжигчин хүн бол тухайн оноогдсон дүрээ тайз болон дэлгэцэнд амьдруулах ёстой байдаг бол орлон тоглогч тухайн кинонд гарч байгаа хүнд ,хэцүү,эрсдэлтэй хэсгийг хийж гүйцэтгэдэг, илүү эр зоригийн жүжигчин гэж боддог.

- Сургуулиа төгсөөд хэчнээн кинонд орлон тоглогчоор ажилласан бэ. Хүнд, бэрхшээлтэй зүйл нь юу байдаг вэ. Тоглож байсан уран бүтээлээс тань хамгийн хүнд нь ямар кино байсан бол?

-Би орлон тоглогчийн багт ороод гурван жил болох гэж байна. Энэ хугацаанд зургаан кинонд ажилласан байна. Үүнээс гурван уран бүтээлд н гол дүрийн орлон тоглогчоор ажиллаж байсан юм байна. Олон эрэгтэй хүнтэй ажилладаг болхоор эрэгтэй баатарын хувцас өмсөөд царайгаа жаахан нуугаад баатар болоод ажилласан уран бүтээл ч бий. Мэдээж хэцүү хүнд трюк-ууд , хүнд хэцүү үе тохиолдоно. Гэхдээ хүнд бэрхшээлтэй байна гээд нялхараад байвал юу ч сурахгүй, урагшаа ахихгүй гэж боддог доо. Харин тоглож байсан уран бүтээлээс гэвэл яг онцолсон кино байхгүй. Хийхээсээ өмнө бүх трюк л аймар санагддаг. Харин хийснийхээ дараа бол “Аан, ингэх юм байна” гэж бодогдоод, айдас багасаад эхэлдэг.

Нэг удаа трюк хийхдээ нууцаар уйлж байсан минь санаанаас гардаггүй. Гэхдээ кино биш, CV видео хийж байсан юм. Морины хажууд нуугдалт хийж байгаад хүзүүн дээгүүр нь гарч ирж харвах байсан. Тэгээд эхлээд морин дээр өөрөө нуугдалтаа хийгээд давхиж байгаад яг харвах хэсэгтээ мориндоо бүтэн хүлүүлсэн. Учир нь, хоёр гартаа нум сум барьцан байгаа болохоор надад эмээлнээсээ барих ямар ч арга байгаагүй . Ер нь бол зуун хувь мориндоо найдсан трюк байсан. Тэр л их хэцүү санагдаж байсан юм.

-Таныг морин дээрээс харвана, тулааны хүнд трюк хийдэг гэж байсан. Ихэвчлэн киноны ямар хэсгүүдэд орлон тоглодог вэ?

-Би мориноос унах , шатнаас унах, өнхөрөх , гүүрэн дээрээс ус руу үсрэх , машинд мөргүүлэх, харвах , сэлэмтэй болон гардан тулаан хийх зэрэг гэх хэсгүүдэд орлон тоглож байсан

-Орлон тоглогчоосоо болиод жүжигчин мэргэжлээрээ ажиллаж, киноны дүрд тоглох бодол байдаг уу?

-Орлон тоглогчоо болино гэж боддоггүй ээ. Мэдээж кинонд тоглох хүсэл бий. Гэхдээ орлон тоглогчийн мэргэжлийг орхихгүйгээр кинонд тоглоно гэж боддог. Одоогоор бол урдаа тавьсан зорилго маань бол кинонд тоглохоос илүүтээгээр ахиад л их юм сурмаар, чадахгүй байгаа юмаа чаддаг болмоор байна. Тэгээд цаг нь болохоор аяндаа болно.

-Монголд эмэгтэй орлон тоглогчид цөөхөн байдаг гэсэн. Ямар учраас орлон тоглогч цөөхөн байдаг юм бол, танд зааж, зөвлөдөг хүн бий болов уу?

-Орлон тоглогч маш хүнд мэргэжил шүү дээ. Их эрсдэлтэй байдаг болохоор эмэгтэй орлон тоглогч цөөхөн байдаг байх. Анх би ганцаараа ах нартайгаа бэлтгэл хийдэг байсан. Одоо харин гурван орлон тоглогч эмэгтэй байна. Намайг ороод гурван сарын дараа зулцэцэг гээд дүү маань орж ирж байсан. Сүүлд хоёр сарын өмнө нэг эмэгтэй орлон тоглогч нэмэгдсэн. Ах нар маань бүгд л надад тусалж зөвлөдөг. Тэр дундаа Наранбаатар , Цэрэгбаяр , Түвшинбаатар гээд ах нар маань голчлон, бэлтгэлжилт арга техник зааж бэлдүүлдэг дээ .

-Монголын кино, уран бүтээлд орлон тоглогчийн эрэлт хэр байдаг вэ?

-Кино урлаг хурдацтай хөгжиж байгаагийн хэрээр, орлон тоглогчийн ажил эрэлттэй байгаа.

-Тухайн киноны бодил дүрүүдтэй зэргцэн орлон тоглогчоос жинхэнэ байх, тухайн дүрээ мэдрэх зэрэг чадвар шаарддаг болов уу?

-Царай нь л гарддаггүй болохоос биш тулаан хийж байхдаа, тухайн дүр ямар сэтгэл хөдлөлтэй байна тэр тээшийг биеийн хэлэмжээрээ жүжигчинтэйгээ яг адилхан л илэрхийлэх хэрэгтэй байдаг. Энэ ч утгаараа жинхэнэ байх, дүрээ мэдрэх чадвар бий.

-Яагаад жүжигчин мэргэжлийг сонгосон бэ?

-Ямар нэгэн шалтгаанаас болж урлагийг сонгосон юм байхгүй ээ. Хүүхэд байхдаа анх ухаан ороод, мөрөөдсөн хүссэн мэргэжил бол жүжигчин. Би жаахан байхдаа хүүхдүүдтэй айл гэр болон тоглож, бүр чин сэтгэлээсээ дүрдээ ороод тоглодог байсан. Нэг ч удаа өөр мэргэжил бодолгүй мөрөөдлийнхөө төлөө явсаар байгаа минь энэ.

-Цаашдын зорилго, мөрөөдлөөсөө бидэнтэй хуваалцаач?

-Би цаг нь болохоор Action эмэгтэй жүжигчнээр ажилна гэж боддог. Гэхдээ "Хурдан явъя гэвэл ганцаараа , Хол явъя гэвэл олуулаа “ гэдэг шиг орлон тоглогчийн багт ажиллаж нэг эд эс нь болсон цагаасаа хойш, хамт олонтойгоо дэлхийн давцан дээр зогсохыг л хүсдэг.

-Ярилцсанд баярлалаа-

А.ЦЭНДДУЛАМ: Би цаг нь болохоор Action эмэгтэй жүжигчнээр ажиллана гэж боддог

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.eccold.top хариуцлага хүлээхгүй.

Нийт сэтгэгдэл: 6

Сэтгэгдэл үлдээсэн: 2022-06-20 13:00:54

saraa: nice
Сэтгэгдэл үлдээсэн: 2022-03-06 13:50:40

Ajaa: Duudee amjilt husie
Сэтгэгдэл үлдээсэн: 2022-03-05 08:58:15

Л.цэрэндагва: Дүүдээ Амжилт хүсье
Сэтгэгдэл үлдээсэн: 2022-03-04 15:22:26

Алтайсайхан: дүү охинд баяр хүргэе хүн зорилго чиглэлтэй түүгээрээ баяртай ажиллах сайхаан амжилт хүсье
Сэтгэгдэл үлдээсэн: 2022-03-03 23:49:26

zochin: woow ymar mundag yum be
Сэтгэгдэл үлдээсэн: 2022-03-03 16:41:50

Amaa: Khairtai duudee ulam ikh amjilt khusie, zorisondoo khureerei,chi chadnaa