“Чиний эрхлэх цаг дуусчихсан. Яагаад Б.Түмэнбаяр багш, аав, ээжийнхээ үгэнд орохгүй, уурлаад байгаа юм” гээд дүүгээ загнах эгч, чимээгүйхэн хэлснийг нь сонсоод суух дүү хоёрын дүрс бичлэг цахим сүлжээнд хүмүүсээс эерэг хандалт аваад байсан билээ. Хэвлүүхэн яриатай эгчийг Б.Гэгээн гэдэг, "Гёте" сургуулийн дөрөвдүгээр ангид сурдаг. Харин дүү Б.Билгүүн нь энэ жил нэгдүгээр ангид элссэн гэнэ.

Цахим сүлжээнд тарсан дүрс бичлэг Б.Билгүүний бэлтгэл ангид сурч байх үеийнх гэнэ. Б.Гэгээн дүүгээ сайн хүн болоосой гэж хүссэн учраас хааяа уурлачихдаг гэнэ.

Томоотой суугаад эгчийнхээ үгийг сонсож суусан Б.Билгүүн “Эгчийгээ хааяа л уурлуулчихдаг. Намайг хичээлээ хийгээгүй гэж бодоод, тэр үед загнасан юм. Би уг нь а, э, и, о гээд үсгээ сайн сурч байсан. Б.Гэгээн эгч намайг хичээлээ хийж байхыг сонссон. Эгч маань эмч болно гэсэн. Харин би цагдаа болно. Хүмүүст тусалж, муу хүмүүсийг баривчилна” гэсэн юм.

Ингээд хэвлүүхэн яригаараа бусдын хайрыг татсан Б.Гэгээн охинтой ярилцсанаа хүргэж байна.

-Чиний дүүгээ зэмлэж байгаа бичлэг цахим сүлжээнд өндөр хандалттай байгаа. Чи бичлэгээ үзсэн үү?

-Би үзээд зөндөө ичсэн. Дүүгээ хичээлээ сайн хийгээд мундаг хүн болоосой гэж бодсон учраас уурласан юм. Би түр зуур л уурласан.

-Дүүтэй болж байгаагаа мэдэх ямар байсан бэ?

-Би их баярласан. Эгчтэйгээ, дүүтэйгээ тоглож, хичээлээ хийнэ гэхээр гоё санагдаж байсан. Дүүгээ зөндөө хайрладаг, миний дүү болсонд нь баярладаг. Гэхдээ одоо дүүтэйгээ гадаа тоглох дургүй ээ. Миний үгэнд орохгүй сахилгагүйтээд байдаг юм.

-Дүү нь чамаас мэдэхгүй хичээлээ асууж байна уу?

-Надаас мэдэхгүй хичээлээ асуудаггүй. Эгчээр заалгачихдаг. Хэрэв надаас асуух юм бол би зааж өгөхөд бэлэн байгаа.

-Чи ямар хичээлийг нь хамгийн сайн зааж чадах вэ?

-Би монгол хэл, математикийн хичээлдээ дуртай учраас дүүдээ сайн зааж чадна. Гэхдээ надаас асуудаггүй юм аа.

-Дүү чинь хэзээ чиний уурыг хамгийн их хүргэж байна?

-Миний үгийг тоохгүй сахилгагүйтээд байхаар нь жаахан уурлачихдаг.

-Тэгвэл хэзээ хамгийн хайр татам харагддаг вэ?

-Миний дүү инээхээрээ хөөрхөн. Хүний үгэнд ороод нүд нь гэрэлтэхээрээ хамгийн хөөрхөн нь байдаг учраас хааяа өрөвдөөд уурладаггүй.

-Дүүгээ ирээдүйд ямар хүн болоосой гэж хүсдэг вэ?

-Өндөр, ухаантай, сайн хүн болоосой гэж хүсдэг.

-Б.Түмэнбаяр багшийнхаа талаар ярихгүй юу?

-Багш маань олон зүйл заадаг. Манай багш сайхан сэтгэлтэй, хөгжилтэй.

-Ирээдүйд ямар мэргэжилтэй болох вэ?

-Би том болоод эмч болно. Тэгээд хайртай хүмүүсээ эмчлэн. Б.Билгүүн заримдаа гараа зүсчихнэ, аав, ээж өвдөнө. Тэр бүрийг нь эмчилдэг эмч болж, өөр олон хүнд тусална.