“Фантастик” продакшны хамт олон видео сангуудаар төлбөртэйгээр гаргах “Зура” киноны гурван өдрийн орлогоо хоол хүнсний тусламж нэн тэргүүнд хэрэгтэй хүмүүст хандивлах болсноо мэдэгдлээ. Мөн тэд урлаг, соёлынхон, уран бүтээлчид болоод хүнс үйлдвэрлэгчдийг тусламж хэрэгтэй ард түмэнд тусламжийн гараа сунгахыг уриалжээ. Тиймээс өнөөдрөөс эхлэн Univision, Skymedia кино сангаас үзсэн “Зура” киноны төлбөр хөл хорионд байгаа, хүнсээ худалдаж авах боломжгүй хүнсний хомсдолд орох магадлалтай болон хөгжлийн бэрхшээлтэй, эмзэг бүлгийн хүмүүст тусламж болж хүрэх аж. Мөн тэд өнгөрсөн тавдугаар сарын 18-нд “Зура” шоу нэвтрүүлгийн шагнал болох найман сая төгрөгөө Улсын онцгой комисст хандивлаж байсан билээ.