Увс аймгийн Тэс суманд ой хээрийн түймэр гарчээ. Түймрийг тус сумын ЗДТГ-ын ажилтнууд болон байгаль хамгаалагчид цаг алдалгүй унтрааж, аюулгүй болгосон байна.

Энэ талаар Увс аймгийн Тэс сумын ЗДТГ-ын дарга Б.Чойсүрэнгээс тодруулахад “Өчигдөр буюу гуравдугаар сарын 22-ны 15:00 цагийн үед сумын төвөөс холгүй байх газарт гал гарч байгаа нь харагдсан. Бид яаралтай арга хэмжээ авч, гал гарч байгаа газар руу хүн явуулж харуулсан юм. Очиход нь зэгс шатаж байсан юм билээ. Тэгээд сумын төвөөс надаар ахлуулсан ЗДТГ болон байгаль орчны хамгаалагч гэсэн найман хүний бүрэлдэхүүнтэй баг очиж, 90 минут ажиллаж, унтраасан. Шатсан талбай хэмжээ нь, өргөн нь 50 метр, урт нь 600 метр орчим байсан байх. Ойр хавьд нь айл, ой мод байхгүй учраас аюул учраагүй. Хэдийгээр цас хайлж эхэлж байгаа ч түймэр гарах эрсдэл өндөртэй байна” гэлээ.