Осгох аюултай байсан өсвөр насны таван хүүхдийг аварсан талаар Онцгой байдлын газраас мэдээлсэн. Энэ талаар бид Сэлэнгэ аймгийн Онцгой байдлын газрын орлогч дарга, хошууч Г.Батсүхээс тодруулахад “Манай Онцгой байдлын газарт өчигдөр 3:00 цагийн үед “Алтанбулаг сумаас Сүхбаатар сум руу алхаж байна, гадаа хүйтэн байгаа учир осгох аюултай байна, авраач” гэсэн дуудлага мэдээлэл ирсэн. Дуудлагын дагуу манай Онцгой байдлын газрын Хэрлэн ахлагчтай баг очиход насанд хүрээгүй таван хүүхэд машингүй, алхсан байдалтай байсан. Албан хаагчдыг очиход хүүхдүүдийн биеийн байдал хэвийн байсан. Алтанбулаг сумаас Сүхбаатар сум руу 24 километрийн зайтай байдаг бөгөөд гадаа өндөр хэмийн хүйтэнтэй байсан учир хүүхдүүд осгох аюултай байсан. Хүүхдүүдийг Сэлэнгэ аймгийн Цагдаагийн газар хүлээлгэн өгсөн” гэв.