Хөвсгөлийн аймгийн Жаргалант сумын ерөнхий боловсролын сургуулийн 9-12 дугаар ангийн сурагчдыг охидын үзлэгт хамруулж, жирэмсний тестээр шалгажээ. Тодруулбал, тус сумын сургуулийн захиргаа болон Эрүүл мэндийн төв хамтран охидыг өнгөрсөн хоёр жилийн хугацаанд эрсдэлтэй байсан гэж үзээд жирэмсний тестээр шалгаж үзэх ажлыг зохион байгуулсан гэнэ. Тэд ингэхдээ охидыг сургууль болон эмнэлгийн ариун цэврийн өрөөнд оруулж, хувинд бие засуулж, жирэмсэн, бэлгийн замын халдварт өвчин авсан эсэхийг нь тестээр үзжээ. Эмнэлгийн бус орчинд хүүхдүүдэд болон эцэг, эхчүүдэд урьдчилан мэдэгдэлгүйгээр охидын үзлэг зохион байгуулсан нь хүний эрхийн ноцтой зөрчил юм.

Бид энэ талаар Хөвсгөл аймгийн Жаргалант сумын Хүн эмнэлгийн даргатай холбогдож, тодруулахад  “Охидыг хувинд шээлгэж, жирэмсний тестээр үзсэн асуудлыг шалгах газар нь шалгасан. Шалгалтын дараа нэгдсэн мэдээлэл өгч, албан ёсоор тайлбар хийнэ. Өөр мэдээлэл өгөх боломжгүй” гэлээ.

          Мөн уг үйл ажиллагааг хамтарч зохион байгуулж, сурагчдынхаа эрх ашгийг хамгаалаагүй, хүүхдийн эрхийг зөрчсөн сургуулийн удирдлагуудтай холбогдож мэдээлэл авах гэсэн боловч “Яг одоо манай сургууль дээр аймгийн Боловсролын газраас шалгалт ирсэн. Хуралтай байгаа учраас мэдээлэл өгөх боломжгүй” гэлээ.

Өнгөрсөн жил Хөвсгөл аймгийн Боловсролын газраас охидын үзлэг хийхийг хориглосон арга хэмжээ авсан байжээ.